बैलजोडी चोरट्याला अवघ्या २४ तासांत केली अटक, भंडारा येथून बैलजोडी घेतली ताब्यात

प्रशांत चंदनखेडे वणी 

तालुक्यातील कृष्णापूर येथील शेतकऱ्याची बैलजोडी १४ सप्टेंबरला सायंकाळी ७ वाजता चोरीला गेली. शेतकऱ्याने १५ सप्टेंबरला सकाळी १० वाजता अज्ञात चोरट्यांनी बैलजोडी चोरून नेल्याची तक्रार शिरपूर पोलिस सेटशनला नोंदविली. आणि ठाणेदार माधव शिंदे यांनी अवघ्या २४ तासांत या चोरी प्रकरणाचा छडा लावून चोरट्याच्या मुसक्या आवळल्या. आपल्या कौशल्यपूर्ण तपासातून गुन्हेगारांचा शोध लावण्यात माहीर असलेल्या ठाणेदार माधव शिंदे यांनी फरारीतील अनेक गुन्हेगारांना तुरुंगवारी घडविली आहे. गुन्हेगार कुठल्याही बिळात लपलेला असो ते आपल्या तर्कशुद्ध तपासणे त्याला शोधून काढतात. त्यांचं खबरी नेटवर्क अतिशय स्ट्रॉंग आहे. गंभीर गुन्ह्यांच्या तपासात नेहमीच त्यांचं सहकार्य लाभलं आहे. शेतकऱ्याची बैलजोडी चोरी करणाऱ्या चोरट्यालाही त्यांनी २४ तासांत शोधून काढलं. भोलाराम सुरेश पडोळे (३३) रा. डोर्ली असे या अटकेतील आरोपीचे नाव आहे. आरोपी भोलाराम पडोळे याने आपल्या दोन साथीदारांसह बैलजोडी चोरी केल्याची कबुली दिल्यानंतर पोलिसांनी भंडारा येथून बैलजोडी व पिकअप वाहन असा एकूण ४ लाख २० हजार रुपयांचा मुद्देमाल जप्त केला आहे. तसेच त्याच्या अन्य साथीदारांचाही पोलिसांकडून कसून शोध घेतला जात आहे. 

शिरपूर पोलिस स्टेशन अंतर्गत येणाऱ्या कृष्णापूर येथिल रहिवाशी असलेल्या नामदेव दादाजी लांडे या शेतकऱ्याची शेतात बांधून असलेली बैलजोडी अज्ञात चोरट्यांनी चोरून नेली. त्यांनी याबाबत शिरपूर पोलिस सेटशनला तक्रार नोंदविल्यानंतर गुन्हेगारांच्या मुसक्या आवळण्यात महत्वपूर्ण भूमिका बजावणारे ठाणेदार माधव शिंदे यांनी अवघ्या २४ तासांत या चोरी प्रकरणाचा छडा लावला. आपल्या कौशल्यपूर्ण तपासातून त्यांनी शेतकऱ्याची बैलजोडी चोरी करणाऱ्या चोरट्याला गजाआड केले. त्याने आपल्या सहकाऱ्यांच्या मदतीने बैलजोडी चोरी केल्याची कबुली दिली. चोरीत सहभागी असलेले त्याचे दोन साथीदार पिकअप (MH २९ BE ६९३२) मध्ये बैलजोडी घेऊन भंडाऱ्याला गेले असल्याचे त्याने पोलिसांना सांगितले. त्याच्या कबुली जबाबावरून ठाणेदार माधव शिंदे यांनी रात्रीच भंडाऱ्याला पोलिस पथक रवाना केले. पोलिस पथकाने भंडारा येथून बैलजोडी किंमत १ लाख २० हजार रुपये व गुन्हयात वापरलेले पिकअप वाहन असा एकूण ४ लाख २० हजार रुपयांचा मुद्देमाल जप्त केला आहे. तसेच आरोपी भोलाराम पडोळे व त्याच्या दोन साथीदारांविरुद्ध चोरीचा गुन्हा दाखल करण्यात आला आहे. पुढील तपास ठाणेदार माधव शिंदे यांच्या मार्गदर्शनात पोलिस करीत आहे. 

सादर कार्यवाही एसडीपीओ गणेश किंद्रे यांच्या मार्गदर्शनात ठाणेदार माधव शिंदे, पोउपनि रावसाहेब बुधावत, पोहवा गंगाधर घोडाम, नापोकॉ गजानन सावसाकडे, चालक पोकॉ विजय फुल्लुके यांनी केली.