हजारो समर्थकांच्या उपस्थितीत संजीवरेड्डी बोदकुरवार यांनी दाखल केला नामांकन अर्ज

प्रशांत चंदनखेडे वणी 

वणी विधानसभा क्षेत्रातून सलग दोन पंचवार्षिक निवडणुकीत विजय साकार करणाऱ्या संजीवरेड्डी बोदकुरवार यांनी २०२४ च्या विधानसभा निवडणुकीतही विजयाचा झेंडा फाटकाविण्याचं उद्दिष्ट ठेऊन आज हजारो समर्थकांच्या उपस्थितीत उमेदवारी अर्ज दाखल केला. विजयाची हॅट्रिक साधण्याचा निर्धार करून ते निवडणुकीच्या मैदानात उतरले आहेत. विजयी घौडदोड कायम ठेवण्याचा त्यांचा संकल्प दिसून येत आहे. उमेदवारीसाठी निर्माण झालेल्या आव्हानात्मक परिस्थितीतूनही त्यांनी उमेदवारी आपल्या पदरी पाडून घेतली. पक्षाचा विश्वास संपादन करण्यात त्यांनी यश मिळविले. भाजपने संजीवरेड्डी बोदकुरवार यांनाच पसंती देऊन त्यांच्यावर विश्वास दाखविला आहे. भाजप कडून उमेदवारी जाहीर झाल्यानंतर आज २८ ऑक्टोबराला बोदकुरवार यांनी जोरदार शक्ती प्रदर्शन करीत हजारो समर्थकांच्या उपस्थितीत आपला नामांकन अर्ज दाखल केला. त्यांचे नामांकन दाखल करण्याकरिता मध्यप्रदेशचे कॅबिनेट मंत्री प्रल्हाद सिंग पटेल यांनी देखील उपस्थिती दर्शविली होती. यावेळी शासकीय मैदानावर भव्य सभा घेण्यात आली. 

संजीवरेड्डी बोदकुरवार हे आज नामांकन अर्ज दाखल करणार असल्याने वणी विधानसभा क्षेत्रातील भाजपच्या पदाधिकारी व कार्यकर्त्यांची पावले शहराकडे वळताना दिसली. सकाळपासूनच भाजपच्या पदाधिकारी व कार्यकर्त्याची शहरात गर्दी दिसून आली. आमदार बोदकुरवार यांचे वणी विधानसभा क्षेत्रातील समर्थकही हजारोंच्या संख्येने उपस्थित झाले. उमेदवारी अर्ज दाखल करण्याकरिता संजीवरेड्डी बोदकुरवार यांच्या समर्थनार्थ शहरातून भव्य मिरवणूक काढण्यात आली. यावेळी पदाधिकारी व कार्यकर्त्यांमध्ये वेगळाच जोश व उत्साह दिसून येत होता. भाजप समर्थकही उस्फुर्तपणे मिरवणुकीत सहभागी झाले होते. शहरातील प्रमुख मार्गाने ही मिरवणूक तहसील कार्यालयाजवळ पोहचल्यानंतर सहाय्यक निवडणूक निर्णय अधिकारी यांच्याकडे संजीवरेड्डी बोदकुरवार यांनी आपला नामांकन अर्ज सादर केला. यावेळी भाजपचे पदाधिकारी, कार्यकर्ते व समर्थकांची उपस्थिती लक्षणीय होती.