🚨भरधाव ट्रकची धडक; वणीतील पोलीस कर्मचारी व चिमुकली जखमी — उपचारादरम्यान चिमुकलीचा मृत्यू

प्रशांत चंदनखेडे वणी :-

वणी–मुकुटबन मार्गावरील गणेशपूर गावाजवळून वळण घेतांना भरधाव ट्रकने दुचाकीला दिलेल्या धडकेत पोलीस कर्मचारी आणि त्यांची चार वर्षांची चिमुकली गंभीर जखमी झाल्याची हृदयद्रावक घटना घडली. उपचारादरम्यान चिमुकलीचा दुर्दैवी मृत्यू झाल्याने परिसरात हळहळ व्यक्त होत आहे.

सविस्तर माहिती अशी की, वणी पोलीस ठाण्यात कार्यरत असलेले श्रीनिवास चंद्रय्या गॉन्लावार (वय ३७, रा. ड्रीमलँड सिटी, वणी) हे २४ जानेवारी रोजी रात्री साडेनऊच्या सुमारास आपली मुलगी कु. श्रावणी (वय ४) हिला मोटारसायकलवरून घरी नेत होते. गणेशपूर येथील चढावर वेग कमी करून मुकुटबन रोडकडे वळत असतानाच वणीहून मुकुटबनकडे जाणाऱ्या एका भरधाव ट्रकने त्यांच्या दुचाकीला (MH २९ -७०९७) जोरदार धडक दिली.

या अपघातात श्रीनिवास गॉन्लावार यांच्या दोन्ही पायांना व चेहऱ्याला गंभीर दुखापत झाली, तर चिमुकली श्रावणी हिला हात व पोटाला गंभीर मार लागला. अपघातानंतर ट्रकचालक घटनास्थळावर न थांबता पसार झाला. आसपासच्या नागरिकांनी घटनास्थळी धाव घेत दोघांनाही वणी येथील एका खाजगी रुग्णालयात दाखल केले. मात्र श्रावणीची प्रकृती गंभीर असल्याने तिला पुढील उपचारांसाठी चंद्रपूर येथे हलविण्यात आले. परंतु उपचारादरम्यान तिचा दुर्दैवी मृत्यू झाला.

या घटनेमुळे परिसरात संतापाची लाट उसळली असून, सुसाट व निष्काळजीपणे वाहन चालविणाऱ्या ट्रकचालकांविरोधात कठोर कारवाईची मागणी होत आहे. अज्ञात ट्रकचालकाविरुद्ध कायदेशीर कारवाई सुरू असून पोलिस पुढील तपास करीत आहेत.