🔺 उभ्या टिप्परला दुचाकीची धडक; तरुणाचा जागीच मृत्यू

प्रशांत चंदनखेडे वणी:–

यवतमाळ मार्गावरील गौराळा खदान परिसरात उभ्या असलेल्या टिप्परला दुचाकीची जोरदार धडक बसून एका तरुणाचा दुर्दैवी मृत्यू झाल्याची घटना सोमवारी सायंकाळी घडली. या घटनेमुळे परिसरात हळहळ व्यक्त होत असून निष्काळजीपणाचा गंभीर प्रश्न पुन्हा ऐरणीवर आला आहे.

मृतकाचे नाव नारायण पंढरी पोईनकर (वय ३५, रा. मुक्टा, ता. मारेगाव) असे असून तो शेतीमजुरी करून कुटुंबाचा उदरनिर्वाह करीत होता. मिळालेल्या माहितीनुसार, नारायण पोईनकर हे शेतीच्या कामानिमित्त बाहेर गेले होते. सायंकाळी सुमारे ७ वाजताच्या सुमारास ते आपल्या दुचाकीने (एमएच २९-८४१८ स्प्लेंडर) मारेगावहून वणीकडे जात असताना गौराळा खदान जवळ रस्त्यावर उभ्या असलेल्या टिप्परला त्यांच्या दुचाकीची जोरदार धडक बसली.

अपघातानंतर स्थानिकांनी तत्काळ त्यांना शासकीय रुग्णालय, मारेगाव येथे हलविले. मात्र डॉक्टरांनी त्यांना मृत घोषित केले. या घटनेची माहिती मिळताच नातेवाईक व गावकरी रुग्णालयात दाखल झाले.

या प्रकरणी फिर्यादी नितेश पंढरी पोईनकर यांनी दिलेल्या तक्रारीवरून संबंधित टिप्पर (क्र. एमएच ३१ एपी ७०६८) चालकाविरुद्ध गुन्हा नोंद करण्यात आला आहे. टिप्पर रस्त्यावर कोणतेही इंडिकेटर किंवा पार्किंग लाईट न लावता उभा करून ठेवण्यात आल्यामुळेच हा अपघात घडल्याचा आरोप करण्यात आला आहे.

या प्रकरणाचा पुढील तपास सहाय्यक पोलीस उपनिरीक्षक दिगांबर किनाके करीत असून, अपघातास कारणीभूत ठरलेल्या चालकाविरुद्ध कडक कारवाईची मागणी होत आहे.