पिंपळखुटीतून संघर्षाचा बिगुल; १०० किमी पायी लाँग मार्चला सुरुवात, रखरखत्या उन्हात आंदोलनकर्त्यांचा उत्स्फूर्त प्रतिसाद

प्रशांत चंदनखेडे वणी :-

यवतमाळ जिल्ह्यातील शेतकरी, शेतमजूर, आशा कर्मचारी आणि वनजमीन कसणाऱ्या कष्टकऱ्यांच्या प्रलंबित प्रश्नांनी आता उग्र रूप धारण केले आहे. प्रशासनाकडून सातत्याने होणाऱ्या दुर्लक्षाविरोधात आंदोलनाची ठिणगी पेटली असून हजारो अन्यायग्रस्त रस्त्यावर उतरले आहेत. तेलंगणा सीमेवरील पिंपळखुटी येथून यवतमाळ जिल्हाधिकारी कार्यालयावर धडक देणाऱ्या १०० किमी पायी लाँग मार्चला रविवारी उस्फूर्तपणे सुरुवात झाली. स्थानिक सरपंच सामी अण्णा मरेड्डीवार यांच्या हस्ते या संघर्ष यात्रेला हिरवा झेंडा दाखविण्यात आला.

अखिल भारतीय किसान सभा, सीटू आशा कर्मचारी युनियन, स्त्री परिचर संघटना आणि आदिवासी अधिकार मंच यांच्या संयुक्त विद्यमाने आयोजित हा लाँग मार्च १९ ते २२ एप्रिल २०२६ दरम्यान चार दिवस कडक उन्हात पार पडणार आहे. ॲड. कुमार मोहरमपूरी, चंद्रशेखर सिडाम, ॲड. डी. बी. नाईक, देविदास मोहकर, उषा मुरखे, अनिता खुनकर, मनीष इसाळकर आदींच्या नेतृत्वाखाली हजारो आंदोलनकर्ते पायदळ मार्गक्रमण करत आहेत.

🔴 उन्हाची तमा नाही; हक्कांसाठी पायपीट

पहिल्या दिवशी पिंपळखुटीहून निघालेला मोर्चा सुमारे १५ किमी अंतर पार करून सूना येथील गणेश मंदिरात मुक्कामी पोहोचला. पुढील टप्प्यात कोंघरा व ढेगाले महाराज मंदिर मार्गे हा मोर्चा यवतमाळकडे आगेकूच करणार आहे.

भर उन्हातही तरुण, वृद्ध, महिला आणि कामगार मोठ्या जिद्दीने चालत असल्याचे चित्र या मोर्च्यात पाहायला मिळत आहे.

🔴 ‘आता निर्णय हवा!’ — संतप्तांचा थेट इशारा

यवतमाळ हा आत्महत्याग्रस्त जिल्हा म्हणून ओळखला जात असताना शेतकऱ्यांचे प्रश्न अजूनही सुटलेले नाहीत. कर्जबाजारीपणा, अपुरा पीकदर, योजनांचा लाभ न मिळणे यामुळे शेतकरी हवालदिल झाले आहेत. दुसरीकडे आशा कर्मचारी व स्त्री परिचारिका थकीत मानधनासाठी झगडत आहेत, तर भूमिहीन आदिवासी हक्काच्या जमिनीपासून वंचित आहेत.

याच पार्श्वभूमीवर हा लाँग मार्च म्हणजे “आता केवळ आश्वासन नको, ठोस निर्णय हवा” असा संतप्त संदेश देणारा ठरत आहे.

🔴 मागण्यांसाठी मोर्चेकरांचा ठाम पवित्रा

मोर्चेकऱ्यांनी शासनासमोर मांडलेल्या प्रमुख मागण्यांमध्ये कोणतीही अट न ठेवता सरसकट कर्जमाफी व सातबारा कोरा करावा, पीकदर दुप्पट व आपत्तीग्रस्तांना तातडीची मदत द्यावी, वनजमिनीचे हक्क पट्टे लवकरात लवकर देण्यात यावे, आशा व परिचारिकांचे थकीत मानधन व प्रोत्साहन निधी त्वरित अदा करावा आणि शेतकऱ्यांसाठी सौर ऊर्जा योजना व वन्यप्राण्यांपासून त्यांना संरक्षण मिळावे आदी मागण्यांचा समावेश आहे.

🔴 नेतृत्वामुळे आंदोलनाला धार

या लाँग मार्चमध्ये किसान सभेचे राज्य सचिव डॉ. अजित नवले सहभागी होणार असून, त्यांच्या नेतृत्वामुळे आंदोलन अधिक आक्रमक होण्याची शक्यता आहे.

➡️ निष्कर्ष :

पिंपळखुटीतून सुरू झालेला हा १०० किमी लाँग मार्च केवळ मोर्चा नसून, तो यवतमाळ जिल्ह्यातील वंचितांचा एकत्रित आक्रोश आहे. आता प्रशासन या आवाजाची दखल घेते की दुर्लक्ष करते, यावर पुढील संघर्षाची दिशा ठरणार आहे.