गोदावरी अर्बनचे व्यवस्थापक विजय मोडक यांना मातृशोक

प्रशांत चंदनखेडे वणी :-

गोदावरी अर्बन मल्टीस्टेट क्रेडिट को-ऑप. सोसायटी, वणी शाखेचे व्यवस्थापक तथा प्रतिष्ठित नागरिक विजय मोडक यांच्या मातोश्री श्रीमती बेबीताई अरुणराव मोडक (वय ८०) यांचे गुरुवारी (दि. २० ऑगस्ट) सायंकाळी ६.०५ वाजता आकस्मिक निधन झाले. त्यांच्या निधनाने मोडक कुटुंबावर दुःखाचा डोंगर कोसळला असून विठ्ठलवाडी परिसरात हळहळ व्यक्त होत आहे.

बेबीताई मोडक या सुस्वभावी, मनमिळाऊ आणि हसतमुख व्यक्तिमत्त्व म्हणून परिचित होत्या. विठ्ठलवाडी परिसरात अनेक वर्षांपासून वास्तव्य असल्याने परिसरातील नागरिकांशी त्यांचे जिव्हाळ्याचे व सलोख्याचे संबंध होते. कुटुंबासाठी त्या केवळ गृहिणी नव्हत्या, तर प्रेम, माया आणि संस्कारांची सावली देणाऱ्या कुटुंबाच्या आधारस्तंभ होत्या.

मुलांच्या जडणघडणीत त्यांनी मोलाची भूमिका बजावली. मुलांना उत्तम संस्कार देत त्यांनी त्यांना जीवनात स्वावलंबी बनविले. कुटुंबातील प्रत्येक सदस्याच्या सुख-दुःखात त्या खंबीरपणे उभ्या राहत असत. त्यांच्या प्रेमळ आणि आपुलकीच्या स्वभावामुळे कुटुंबीयांसह नातेवाईक व परिचितांमध्ये त्यांच्याबद्दल विशेष आदर होता.

काही दिवसांपासून त्या वृद्धापकाळाशी संबंधित आजाराने त्रस्त होत्या. उपचार सुरू असतानाच गुरुवारी सायंकाळी त्यांची प्राणज्योत मालवली. त्यांच्या पश्चात दोन मुले, एक मुलगी, सुना, नातवंडे असा मोठा आप्तपरिवार आहे.

त्यांची अंत्ययात्रा शुक्रवारी (दि. २१ ऑगस्ट) दुपारी १२ वाजता विठ्ठलवाडी येथील मोडक परिवाराच्या राहत्या घरून निघणार असून, शहरातील मोक्षधाम येथे त्यांच्या पार्थिवावर अंत्यसंस्कार करण्यात येणार आहेत.

मुलांना घडविणाऱ्या मायेच्या सावलीचे अचानक हरपणे ही मोडक कुटुंबासाठी न भरून निघणारी पोकळी असून, बेबीताई यांच्या निधनाने एक प्रेमळ, कर्तबगार आणि संस्कारक्षम मातृछाया कायमची हरपली आहे.