रक्षाबंधनाच्या स्नेहधाग्यातून सामाजिक बांधिलकीचा संदेश; किरणताई देरकर यांचा आगळा उपक्रम

प्रशांत चंदनखेडे वणी :-

रक्षाबंधन म्हणजे केवळ भाऊ-बहिणीच्या नात्याचा सण नव्हे, तर स्नेह, विश्वास, आपुलकी आणि जबाबदारीची नाती अधिक घट्ट करण्याचा दिवस आहे. याच भावनेतून वणी येथे सन्मान स्त्री शक्ती फाउंडेशनच्या अध्यक्षा किरणताई देरकर यांच्या पुढाकाराने रक्षाबंधनाचा आगळावेगळा सोहळा पार पडला. शिवसेना (उद्धव बाळासाहेब ठाकरे) पक्षाच्या पुरुष व महिला पदाधिकारी, कार्यकर्त्यांना राखी बांधून भेटवस्तू देत त्यांनी सामाजिक बांधिलकीचा संदेश दिला.

या उपक्रमातून पक्षीय संघटनेपलीकडे माणुसकीचे नाते जपण्याचा आणि समाजातील प्रत्येक घटकाच्या सुख-दुःखात खंबीरपणे उभे राहण्याचा संदेश देण्यात आला. स्नेहाचा हा धागा संघटनात्मक एकजुटीशी जोडत कार्यकर्त्यांनी समाजोपयोगी उपक्रमांना प्राधान्य द्यावे, असे आवाहन किरणताई देरकर यांनी केले.

“पक्षाचे काम केवळ राजकीय कार्यक्रमांपुरते मर्यादित न ठेवता सामान्य नागरिकांच्या अडचणी समजून घेऊन त्यांच्या मदतीला धावून जाणे, हीच खरी सामाजिक बांधिलकी आहे,” अशी भूमिका त्यांनी मांडली. महिला सक्षमीकरण, विद्यार्थ्यांना शैक्षणिक मदत, आरोग्य व रक्तदान शिबिरे, वृक्षारोपण, स्वच्छता अभियान, गरजू नागरिकांना मदत तसेच ज्येष्ठ नागरिकांसाठी विविध उपक्रम राबविण्याचे आवाहनही त्यांनी केले.

सन्मान स्त्री शक्ती फाउंडेशनच्या माध्यमातून किरणताई देरकर यांनी यापूर्वीही विविध सामाजिक व सेवाभावी उपक्रम राबवून सामाजिक बांधिलकी जपली आहे. गरजू विद्यार्थ्यांना मदत, सामाजिक उपक्रमांना प्रोत्साहन आणि समाजातील गरजू घटकांच्या पाठीशी उभे राहण्याची त्यांची भूमिका सातत्याने दिसून आली आहे. त्यामुळे रक्षाबंधनाच्या निमित्ताने आयोजित हा उपक्रम त्यांच्या सेवाभावी वाटचालीतील आणखी एक सकारात्मक पाऊल ठरला.

यावेळी महिला पदाधिकाऱ्यांनी आमदार संजय देरकर यांना राखी बांधून रक्षाबंधनाच्या शुभेच्छा दिल्या. सण-उत्सव केवळ उत्साहापुरते मर्यादित न ठेवता त्यातून समाजाशी असलेले नाते अधिक दृढ व्हावे, अशी भावना यावेळी व्यक्त करण्यात आली.

कार्यक्रमास संजय निखाडे, गणपत लेडांगे, सुधीर थेरे, सुनील कातकडे, संतोष कुचनकर, पुरुषोत्तम बुट्टे, विनोद दुमणे, महेश सोमलकर, तुलसी तेवर यांच्यासह महिला जिल्हाप्रमुख डिमन टोंगे, गीता उपरे, सुरेखा ढेंगळे, इंदू किन्हेकार, पौर्णिमा राजुरकर, ममता पारखी, छबु आसूटकर, अमीना पठाण, सविता आवारी, चंदा मुन, कीर्ती देशकर, वर्षा किंगरे, कांचन देरकर, प्रणाली देवाळकर, वैशाली देठे, जिजा वरारकर, वेणू झोडे, मंजू इनामे, वर्षा पोटे यांच्यासह शिवसेना (उबाठा) पक्षाचे पदाधिकारी व कार्यकर्ते मोठ्या संख्येने उपस्थित होते.

स्नेहाचा धागा, सेवाभावाची जोड आणि संघटनेची एकजूट—रक्षाबंधनाच्या या उपक्रमातून सामाजिक बांधिलकीची ही त्रिसूत्री अधोरेखित झाली.