जीवनाची कास न धरता तरुणाने घेतला गळफास, ऐन तारुण्यात त्याने कवटाळले मृत्यूला

प्रशांत चंदनखेडे वणी 

शहरातील सेवानगर परिसरातील बिरसामुंडा चौक येथे वास्तव्यास असलेल्या एका तरुणाने राहत्या घरी गळफास घेऊन आत्महत्या केल्याची घटना काल ५ जूनला सायंकाळी ६.३० वाजताच्या सुमारास उघडकीस आली. प्रफुल विलास परचाके (२१) असे या आत्महत्या केलेल्या तरुणाचे नाव आहे. 

बिरसामुंडा चौक सेवानगर येथे परिवासह वास्तव्यास असलेल्या प्रफुलने राहत्या घरी छताच्या लोखंडी अँगलला ओढणीने गळफास लावून मृत्यूला कवटाळले. तरुण वयातील वळणावर आलेल्या नैराश्येतून त्याने आत्महत्या केल्याचे बोलल्या जात आहे. तारुण्याच्या उंबरठ्यावर पाय ठेवताच मनावरील ताबा सुटतो, व मनाची घालमेल वाढून नैराश्य निर्माण होतं. मनाची सांगड न जुळल्यास टोकाचे निर्णय घेऊन जीवनाचाच शेवट केला जातो. नैराश्येतून आत्महत्या करण्याचे प्रमाण बरेच वाढले आहे. मानसिक खच्चीकरणातूनही मृत्यूला कवटाळले जात आहे. तालुक्यात आत्महत्यांचं सत्रच सुरु असल्याने चिंता व्यक्त केली जात आहे. प्रफुलने आत्महत्येसारखा टोकाचा निर्णय का घेतला, हे अद्याप गुलदस्त्यात असून पोलिस तपासात ते समोर येईल. उमेदीच्या वयात प्रफुलने आत्महत्येसारखा पर्याय निवडल्याने कुटुंबावर दुःखाचा डोंगर कोसळला आहे. प्रफुलच्या अशा या अकाली जाण्याने परिसरात हळहळ व्यक्त केली जात आहे. प्रफुल पश्चात आई, वडील, भाऊ व बहीण असा आप्त परिवार आहे. घटनेचा पुढील तपास पोलिस करित आहे.