प्रशांत चंदनखेडे वणी
शहरातील टिळक चौक ते विराणी टॉकीज रोडवरील माळीपुरा परिसरात असलेले फर्निचरचे दुकान जेसीबीने जमीनदोस्त केल्याची घटना १२ ऑक्टोबरला पहाटे उघडकीस आली. दुकानामध्ये लाखो रुपयांचे साहित्य, किंमती वस्तू, सोन्या चांदीच्या वस्तू व रोख रक्कम असल्याचे सांगण्यात येते. मालमत्तेच्या वादातून हे टोकाचे पाऊल उचलण्यात आल्याचे बोलल्या जात आहे. जागेच्या मालकीहक्कावरून अनेक वर्षांपासून दोन जणांमध्ये वाद सुरु आहे. प्रकरण न्यायप्रविष्ठ देखील आहे. १० ते १२ वर्षांपासून भंडारी हे या ठिकाणी फर्निचरचे दुकान थाटून आहेत. त्यांचा मालमत्तेच्या मालकीहक्कावरून सुरु असलेला संघर्ष न्यायालयापर्यंत पोहचला. दोघांनीही न्यायालयात मालमत्ते बाबत दावा सादर केला. त्यांची न्यायालयीन लढाई सुरु आहे. अशातच मालमत्ता धारकाकडून टोकाचे पाऊल उचलण्यात आले. दुकानावर बेकायदेशीरपणे जेसीबी चालवून दुकानाची नासधूस करण्यात आली. दुकानदाराच्या तक्रारीवरून पोलिसांनी बेकायदेशीर कृत्य करणाऱ्यांवर गुन्हे नोंदवून जेसीबी ऑपरेटर व काही जणांना तात्काळ अटक केली. परंतु मुख्य सूत्रधार मात्र पसार झाले होते. पोलिस त्यांचा कसून शोध घेत होते. पोलिसांनी तांत्रिक बाबींचा अवलंब करून त्यांना मध्यप्रदेशातील छिंदवाडा जिल्ह्यातून अटक केली आहे. समीर रंगरेज, सोनू उर्फ शारिक रंगरेजव जावेद रंगरेज रा. एकता नगर परिसर असे या अटक करण्यात आलेल्या आरोपींची नावे आहेत.
सदर कार्यवाही एसडीपीओ गणेश किंद्रे यांच्या मार्गदर्शनात व ठाणेदार अजित जाधव यांच्या आदेशावरून सपोनि सुदाम आसोरे डीबी पथकाचे विकास धडसे, शुभम सोनुले, सागर सिडाम, वासिम शेख यांनी केली.
No comments: