कोळसा व्यवसायिक व काँग्रेसचे नवनियुक्त पदाधिकारी अफसर शेख यांच्या मुलावर विनयभंगाचा गुन्हा दाखल, पोलिसांनी तिघांना केली अटक

प्रशांत चंदनखेडे वणी 

शहरालगत एका ग्रामपंचायत हद्दीत वास्तव्यास असलेल्या अल्पवयीन मुलीचा विनयभंग केल्या प्रकरणी नवीन वागदरा येथील एका टपोरी तरुणासह त्याच्या दोन साथीदारांवर पोक्सो अंतर्गत गुन्हा दाखल करण्यात आला आहे. अल्पवयीन मुलीची छेड काढणाऱ्या सडकछाप मजनू विरोधात आज तिने दिलेल्या तक्ररी वरून पोलिसांनी विनयभंगाचा गुन्हा दाखल करीत त्याच्यासह त्याच्या दोन मित्रांना अटक केली आहे. आरोपी हा अल्पवयीन मुलीची कधी भर रस्त्यात तर कधी तिच्या घरसमोर जोरजोरात ओरडून छेड काढीत असल्याचे तिने तक्रारीत म्हटले आहे. तिचं जोरजोराने नाव घेऊन व अश्लील शब्द प्रयोग करून आरोपी हा तिला लज्जा येईल असे कृत्य करीत होता. अल्पवयीन मुलीला रस्त्यात गाठून तिचे नाव घेऊन अश्लील शेरेबाजी करीत तिच्याशी गैरवर्तन करणाऱ्या आरोपीचा पोलिसांनी चांगलाच समाचार घेतला. अल्पवयीन मुलीचा पाठलाग करून तिला मानसिक त्रास देणाऱ्या सोहेल अफसर शेख (२०) याच्यासह तेजस भगत व स्वप्नील चिंचोलकर या तीनही आरोपींवर बाल लैंगिक अत्याचार प्रतिबंधक कायद्यानुसार गुन्हा दाखल करण्यात आला आहे.

सोहेल अफसर शेख या तरुणाने शहरालगत वास्तव्यास असलेल्या एका अल्पवयीन मुलीला प्रेमाच्या जाळ्यात ओढले. तिला प्रलोभनं व आमिषे दाखवून तिच्याशी प्रेमसंबंध प्रस्थापित केले. ती त्याच्या भूलथापांना बळी पडून त्याच्या प्रेमात पडली. परंतु नंतर तिला त्याचे इतरही मुलींशी प्रेमसंबंध असल्याचे कळाले. त्यामुळे ती त्याच्यापासून दूर झाली. परंतु सोहेल शेख हा तिच्यावर जबरन प्रेम लादण्याचा प्रयत्न करू लागला. तिला आपली टपोरीगिरी दाखवू लागला. तिच्या घरासमोर उभे राहून जोरजोरात ओरडणं, तिचं नाव घेऊन अश्लील शेरेबाजी करणं, ती घराबाहेर येताच तिची छेड काढणं, या त्याच्या टपोरीगिरीमुळे ती कमालीची धास्तावली होती. मुलीच्या आईने व बहिणीने अनेकदा त्याला समजावण्याचा प्रयत्न केला. पण तो कुणालाच जुमानत नव्हता. तो तिचा नेहमी पाठलाग करून तिचे नाव घेऊन अश्लील शब्द प्रयोग करीत असल्याने बदनामीच्या भीतीने तिने महाविद्यालयात जाणे बंद केले. कधी दुचाकीने तर कधी चार चाकीने आपल्या मित्रांना सोबत घेऊन तो तिचा पाठलाग करून तिला नाहक त्रास द्यायचा. १८ ऑक्टोबरला सोहेल अफसर शेख, तेजस भगत व स्वप्नील चिंचोलकर हे तिघेही रात्री ११ वाजता मुलीच्या घरासमोर उभे राहून जोरजोरात तिचं नाव घेऊन आवाज देत होते. सोहेल शेख हा मुलीचं नाव घेऊन तिला शिवीगाळ करीत असतांना मुलीची आई व बहीण घराबाहेर आली, व त्यांनी त्याला समजावण्याचा प्रयत्न केला. पण तो अरेरावीची भाषा करून त्यांनाच धमकावू लागला. तुम्ही जर पोलिसांत तक्रार केली तर तुमचं जगणं कठीण करेन असा दम त्याने मुलीच्या कुटुंबियांना दिला. त्यामुळे त्याच्यापासून धोका उद्भवण्याची शक्यता लक्षात घेता मुलीने हिंमत करून सोहेल अफसर शेख व त्याच्या मित्रांविरुद्ध पोलिस स्टेशनला तक्रार नोंदविली. मुलीच्या तक्रारी वरून पोलिसांनी सोहेल अफसर शेख, तेजस भगत व स्वप्नील चिंचोलकर या तिघांनाही अटक करून त्यांच्यावर भादंवि च्या कलम ३५४, 354-D, ५०४, ५०६ व सहकलम ११(चार), 12 बाल लैंगिक अत्याचार प्रतिबंधक कायद्यानुसार गुन्हे दाखल केले आहे. पुढील तपास ठाणेदार अजित जाधव यांच्या मार्गदर्शनात एपीआय दत्ता पेंडकर करीत आहे. 

सोहेल हा कोळशाच्या व्यवसायातून मालदार झालेल्या अफसर शेख यांचा मुलगा आहे. अफसर शेख यांची नुकतीच जिल्हा काँग्रेस कमिटीच्या अल्पसंख्यांक प्रमुख पदावर नियुक्ती झाली आहे. काँग्रेसच्या पदाधिकारी व त्यांच्या कुटुंबातील सदस्यांवर दाखल होणारे गंभीर गुन्हे वणी विधानसभा क्षेत्रात काँग्रेसच्या राजकीय वाटचालीला बाधक ठरू शकतात. एकीकडे पक्षश्रेष्ठी पक्षाला उभारी मिळावी म्हणून जनतेशी एकरूप होत आहेत. तर वणी विधानसभा क्षेत्रात काँग्रेसच्या पदाधिकारी व त्यांच्या कुटुंबातील सदस्यांवरच गुन्हे दाखल होऊ लागल्याने निवडणुकीच्या तोंडावर हा चिंतेचा विषय बनला आहे. निवडणुकीची मोर्चेबांधणी करतांना जनतेचा विश्वास जिंकणे गरजेचे असते. पण पक्ष संगठन मजबूत करण्याची जबादारी असलेल्या पदाधिकाऱ्यांविरोधात व त्यांच्या कुटुंबातील सदस्यांविरोधात गंभीर स्वरूपाच्या तक्रारी होऊ लागल्याने पक्ष बांधणीवर त्याचा विपरीत परिणाम होण्याची चिन्हे निर्माण झाली आहेत. वणी विधानसभा क्षेत्रात काँग्रेस मध्ये असलेली गटबाजी आधीच चिंतेचा विषय बनली असतांना आता पदाधिकाऱ्यांच्या प्रतिमाही डागाळल्या जाऊ लागल्याने काँग्रेसला वणी विधानसभा क्षेत्रात अच्छे दिन येण्याचा मार्ग खडतर होतांना दिसत आहे. याकडे गांभीर्याने लक्ष देण्याची गरज निर्माण झाली आहे.