राजूर (कॉ.) येथील मटका अड्ड्यावर पोलिसांची धडक कार्यवाही, मटकाबहाद्दर विजय कंडेवार फरार

प्रशांत चंदनखेडे वणी 

शहरापासून जवळच असलेल्या राजूर (कॉ.) येथील मटका अड्ड्यावर पोलिसांनी नुकतीच धाड टाकली. पोलिसांच्या या धडक कार्यवाहीने राजूर येथील अवैध व्यसायिकांचे चांगलेच धाबे दणाणले आहेत. राजूर (कॉ.) येथे खुलेआम मटका जुगार सुरु असल्याची माहिती ठाणेदार अजित जाधव यांना मिळाली. त्यांनी राजूर येथे पोलिस पथक पाठविले असता तेथे पोलिसांना मटका जुगार खेळणाऱ्यांची मोठी गर्दी आढळून आली. पोलिसांनी राजरोसपणे सुरु असलेल्या या मटका अड्ड्यावर धाड टाकून मटक्याची उतारी घेणाऱ्या एकाला रंगेहात अटक केली. त्याला मटका अड्डा चालविणाऱ्याचे नाव विचारले असता त्याने विजय कंडेवार याच्या मालकीचा हा मटका असल्याचे सांगितले. विजय कंडेवार याचा शोध घेतला असता तो फरार झाल्याचे पोलिस तपासात समोर आले आहे. पोलिस विजय कंडेवार याचा शोध  घेत आहे. 

राजूर (कॉ.) येथे अवैध धंदे फोफावले असल्याची गावकऱ्यांमधून ओरड सुरु होती. राजूर येथील अवैध धंद्यांबाबत प्रसार माध्यमांनीही वेळोवेळी वृत्त प्रकाशित केले होते. त्यामुळे ठाणेदार अजित जाधव यांनी राजूर (कॉ.) येथील अवैध धंद्यांकडे लक्ष केंद्रित केले. त्यांना राजूर (कॉ.) येथील तेलगू वार्ड परिसरात राजरोसपणे मटका अड्डा चालविला जात असल्याची माहिती मिळाली. त्यांनी तत्काळ राजूर येथे पोलिस पथक पाठविले. पोलिसांना तेथे मटका जुगार खेळणाऱ्यांची मोठी गर्दी आढळून आली. पोलिसांनी मोठ्या शिताफीने त्या मटका अड्ड्यावर धाड टाकली. मटका पट्टी फाडणाऱ्या एका आरोपीला पोलिसांनी रंगेहात अटक केली. तर काही जणांनी तेथून पळ काढला. पोलिसांनी मटक्याची उतारी घेणाऱ्या शरद पुनवटकर रा. वणी या आरोपीला मटका मालकाचे नाव विचारले असता त्याने विजय कंडेवार याच्या मालकीचा हा मटका अड्डा असल्याचे सांगितले. पोलिसांनी आरोपी शरद पुनवटकर याच्या जवळून रोख २ हजार १७० रुपये व मटका साहित्य असा मुद्देमाल जप्त केला आहे. आरोपी शरद पुनवटकर व विजय कंडेवार या दोघांवरही पोलिसांनी विविध कलमान्वये गुन्हे दाखल केले आहे. मटकाबहाद्दर विजय कंडेवार हा फरार असून पोलिस त्याचा शोध घेत आहे. पुढील तपास ठाणेदार अजित जाधव यांच्या मार्गदर्शनात  पोलिस करीत आहे. सदर कार्यवाही एसडीपीओ गणेश किंद्रे यांच्या मार्गदर्शनात ठाणेदार अजित जाधव, डीबी पथकाचे विकास धडसे, सागर सिडाम, सुनिल नलगंडीवार यांनी केली.   

एका छोट्याशा गल्लीत मटका पट्टी फाडणारा विजय कंडेवार हा अल्पावधीत राजूर (कॉ.) येथील मटक्याचा बादशहा बनला. त्याने राजूर येथे काही ठिकाणी मटका अड्डे सुरु केले. अवैध व्यवसायात त्याने चांगलाच जम बसवला. राजूर येथील मटका व्यवसायात त्याचं नाव प्रामुख्याने समोर येऊ लागलं. राजूर बिटशी त्याने अर्थपूर्ण संबध ठेवले. सर्वांशी हितसंबंध जोपासून त्याने मटका अड्डे धडाक्यात चालविले. अवैध धंद्यातून त्याने चांगलीच माया गोळा केली. त्याची पाठराखण करण्याचं काम एका लेखनिकाने केलं. पण ठाणेदार अजित जाधव यांनी विजय कंडेवार याच्या मटका अड्यावर धडक कार्यवाही करून त्या लेखनिकाचा संभ्रम दूर केला आहे. पोलिसांवर दबाव आणून अवैध धंद्यात विजयला अजय ठेवण्याचे लेखनिकाचे मनसुबे ठाणेदारांनी उधळून लावले आहे.