शेतकऱ्याच्या मुलाने शेतातीलच झाडाला घेतला गळफास

प्रशांत चंदनखेडे वणी 

तालुक्यात आत्महत्यांचं सत्र सुरूच असून आज आणखी एका तरुणाने नैराश्येतून आत्महत्या केल्याची घटना उघडकीस आली आहे. तालुक्यातील पठारपूर येथे वास्तव्यास असलेल्या तरुणाने शेतातील झाडाला गळफास लावून आपल्या जीवनाचा शेवट केला. ही दुःखद घटना आज २३ डिसेंबरला पहाटेच्या सुमारास उघडकीस आली. स्वप्नील संजय गारघाटे (३०) असे या गळफास घेतलेल्या तरुणाचे आहे. 

स्वप्नील हा पठारपूर येथे आपल्या कुटुंबीयांसोबत रहात होता. त्याचे वडील हे शेतकरी असून त्यांची पठारपूर येथे शेती आहे. स्वप्नील देखील शेत कामात हातभार लावायचा. २२ डिसेंबरला तो नेहमी प्रमाणे शेतात गेला. परंतु बराच वेळ होऊनही तो घरी परतला नाही. रात्रभर तो घरी न आल्याने त्याचा सकाळी शेतात जाऊन शोध घेतला असता तो शेतातीलच झाडाला गळफास घेतलेल्या अवस्थेत आढळून आला. घरातील कर्त्या पुरुषाने असा हा आत्महत्येसारखा टोकाचा निर्णय घेतल्याने कुटुंबावर दुःखाचा डोंगर कोसळला आहे. उभरत्या वयात तरुण नैराश्येतून आत्महत्या करू लागल्याने पालकांच्या चिंता वाढल्या आहेत. कुटुंबाचा आधार असलेल्या तरुण मुलाने आत्महत्येचा मार्ग निवडल्याने कुटुंबं पुरतं हादरलं आहे. तरुणाने गळफास घेतल्याची माहिती पोलिसांना मिळताच पोलिसांनी तात्काळ घटनास्थळ गाठले. घटनास्थळाचा पंचनामा करून मृतदेह उत्तरीय तपासणी करीता ग्रामीण रुग्णालयात पाठविण्यात आला. स्वप्नीलच्या आत्महत्येचे नेमके कारण अद्याप कळू शकले नाही. पुढील तपास पोलिस करीत आहे. स्वप्नील याच्या पश्चात आई, वडील, भाऊ, बहीण असा आप्त परिवार आहे.