नैराश्येतून युवकाची गळफास घेऊन आत्महत्या

प्रशांत चंदनखेडे वणी 

शहरातील आत्महत्यांचे सत्र थांबता थांबत नसल्याने चिंता व्यक्त होऊ लागली आहे. एका मागून एक होत असलेल्या आत्महत्यांनी तालुका हादरला आहे. आज आणखी एका युवकाने नैराश्येतून आत्महत्या केल्याची घटना घडली आहे. शहरातील महात्मा फुले चौक परिसरातील रहिवासी असलेल्या एका विवाहित युवकाने राहत्या घरी गळफास घेऊन आत्महत्या केल्याची घटना आज १५ जानेवारीला दुपारी १ वाजताच्या सुमारास उघडकीस आली. कृणाल पुरुषोत्तम मोडक (४३) असे या गळफास घेतलेल्या युवकाचे नाव आहे. 

मृतक हा पेंटर होता. तो पेंटिंगची कामे करून आपला उदर्निवाह करायचा. त्याला दारूचे व्यसन असल्याचे सांगण्यात येते. आज दुपारी त्याने अचानक राहत्या घरी गळफास घेऊन जिवनाचा शेवट केला. घराच्या आड्याला असलेल्या लाकडी फाट्याला कापडी चिंधीने त्याने गळफास  घेतला. त्याने गळफास घेतल्याचे घराशेजारी राहणाऱ्या त्याच्या काकूच्या लक्षात येताच त्यांनी ही माहिती मृतकाच्या काकाला दिली. मृतक कृणाल मोडक याचे काका तात्काळ घरी पोहचले, व त्यांनी पुतण्याने गळफास घेतल्याची माहिती पोलिसांना दिली. पोलिसांनी घटनास्थळ गाठून घटनास्थळाचा पंचनामा करीत मृतदेह उत्तरीय तपासणी करीता ग्रामीण रुग्णालयात पाठविला. कृणाल मोडक याच्या आत्महत्येचे कारण अद्याप कळू शकले नाही. मृतक हा विवाहित असून तो आपल्या काकाच्या घराशेजारी राहायचा. त्याचे काका निरज सुरेश मोडक यांच्या तक्रारी वरून पोलिसांनी आकस्मिक मृत्यूची नोंद केली आहे. पुढील तपास पोलिस करीत आहे.