दुचाकीला म्हैस आडवी आली आणि घडला अपघात, दोन तरुण जागीच ठार

प्रशांत चंदनखेडे वणी 

तरुणांच्या दुचाकीला म्हैस आडवी आल्याने झालेल्या भीषण अपघातात दोन्ही तरुणांचा जागीच मृत्यू झाल्याची घटना ५ मार्चला मध्यरात्री मुकुटबन मार्गावरील गणेशपूर (खडकी) फाटा येथे घडली. भरधाव दुचाकी म्हशीला धडकल्यानंतर हे दोनही तरुण रस्त्याच्या कडेला असलेल्या शेत शिवारातील खड्ड्यात पडले. रात्रभर गंभीर अवस्थेत ते तसेच खड्ड्यात पडून राहिले व मृत्युमुखी पडले. आज ६ मार्चला सकाळी शेतात गेलेल्या कास्तकाराला हे दोन्ही तरुण मृतावस्थेत आढळून आल्यानंतर या अपघाताचा उलगडा झाला. अपघाताची माहिती पोलिसांना मिळाल्यानंतर पोलिसांनी तात्काळ घटनास्थळ गाठले. घटनास्थळाचा पंचनामा करून दोन्ही तरुणांचे मृतदेह उत्तरीय तपासणी करिता ग्रामीण रुग्णालयात पाठविले. मंगेश कैलास टेकाम (१८) रा. मोहदा व रोहित मरस्कोल्हे रा. तेजापूर ता. वणी अशी या अपघातात ठार झालेल्या तरुणांची नावे आहेत. 

हे दोनही तरुण पल्सर (RS २००) या दुचाकीने भरधाव जात असतांना गणेशपूर (खडकी) फाट्याजवळ अचानक त्यांच्या दुचाकीला म्हैस आडवी आली. भरधाव दुचाकी म्हशीला धडकल्याने दोन्ही तरुण रस्त्याच्या कडेला फेकल्या गेले. रस्त्याच्या कडेला असलेल्या शेत शिवारातील एका खड्ड्यात गंभीर अवस्थेत रात्रभर हे तरुण पडून राहिले. दरम्यान दुखापतग्रस्त या दोन्ही तरुणांचा घटनास्थळीच मृत्यू झाला. आज सकाळी ८ वाजता शेतकरी शेतात गेला असता त्याला दोनही तरुण मृतावस्थेत आढळून आले. शेतकऱ्याने लगेच ही माहिती मुकुटबन पोलिसांना दिली. मुकुटबन पोलिस तात्काळ घटनास्थळी पोहचले. त्यांनी घटनास्थळाचा पंचनामा करून मृतदेह उत्तरीय तपासणी करीता ग्रामीण रुग्णालयात पाठविले. मध्यरात्री दुचाकीने जात असलेल्या तरुणांच्या दुचाकीला म्हशीच्या रूपाने काळ आडवा आला. आणि मार्गात दबा धरून बसलेल्या मृत्यूने आपला डाव साधला. नियतीने या दोन्ही तरुणांना कायमचे हिरावून घेतले. तारुण्याच्या उंबरठ्यावर पाऊल ठेवलेल्या या तरुणांच्या अपघाती मृत्यूने दोन्ही कुटुंबांवर दुःखाचा डोंगर कोसळला आहे. त्यांच्या अशा या अकाली जाण्याने परिसरात हळहळ व्यक्त केली जात आहे. घटनेचा पुढील तपास मुकुटबन पोलिस करीत आहे.