प्रतिबंधित कापूस बियाणे विक्री करणाऱ्या चौघांवर कार्यवाही, ८ लाख ३३ हजारांचा मुद्देमाल जप्त
प्रशांत चंदनखेडे वणी
शासनाने प्रतिबंधित केलेल्या कापूस बियाण्यांची अनधिकृतपणे विक्री करणाऱ्या चार जणांना वडकी व शिरपूर पोलिस स्टेशन हद्दीतून अटक करण्यात आली आहे. त्यांच्या जवळून ८ लाख १५ हजार व १८ हजारांचा मुद्देमाल जप्त करण्यात आला आहे. ही धडक कार्यवाही स्थानिक गुन्हे शाखा पथकाने २७ व २९ मे ला केली. खरीप हंगाम जवळ आल्याने शेतकऱ्यांची बी-बियाणे खरेदी करण्याची लगबग सुरु झाली आहे. या संधीचा फायदा घेण्याकरिता बोगस बियाणे विक्री करणारं रॅकेटही सक्रिय झालं आहे. प्रतिबंधित बियाण्यांची विक्री करून लाखो रुपयांची उलाढाल केली जात आहे. शिरपूर व वडकी पोलिस स्टेशन हद्दीत बनावट कापूस बियाण्यांची विक्री केली जात असल्याची गोपनीय माहिती स्थानिक गुन्हे शाखा पथकाला मिळाली. पथकाने सापळा रचून प्रतिबंधित बियाण्यांची विक्री करणाऱ्या दोन जणांना अतिशय शिताफीने अटक केली. तर अनधिकृत बियाणे विक्री करणाऱ्या चौघांवर गुन्हा दाखल करण्यात आला आहे.
शेतीचा हंगाम जवळ आल्याने शेतकरी बी-बियाणे खरेदी करू लागले आहेत. कृषी केंद्रांमध्ये शेतकऱ्यांची गर्दी पाहायला मिळत आहे. या संधीचा फायदा उचललण्याकरिता अनधिकृत बियाणे विक्री करणाऱ्यांचीही टोळी सक्रिय झाली आहे. शासनाने प्रतिबंधित केलेले कपाशी बियाणे विक्री करीता घेऊन येणाऱ्या आरोपींना एलसीबी पथकाने अटक केली आहे. एलसीबी पथक वडकी पोलिस स्टेशन हद्दीत गुन्हे उघडकीस आणण्याकरिता गस्त घालत असतांना पथकाला दोन जण प्रतिबंधित कापूस बियाणे अनधिकृत विक्री करीता घेऊन येत असल्याची खात्रीदायक माहिती मिळाली. पथकाने कृषी विभागाच्या अधिकाऱ्यांना सोबत घेऊन खैरी बसस्थानकाजवळ सापळा रचला. काही वेळातच या मार्गाने एक कार येतांना दिसली. पथकाने कार थांबवून कारची झडती घेतली असता कारच्या मागील सीट समोरील खुल्या जागेत एका प्लास्टिक पोत्यात प्रतिबंधित कपाशी बियाणे आढळून आले. पथकाने कारचालक व कारमध्ये बसून असलेल्या व्यक्तीला बियाण्याबाबत विचारले असता ते उडवाउडवीची उत्तरे देऊ लागले. त्यांना त्यांची नावे विचारली असता त्यांनी विलास नानाजी देवेवार (४०) व अविनाश संतोषराव निकम (२९) दोन्ही रा. सावित्री पिंपरी अशी सांगितली. पथकाने त्यांना बियाणे कुठून आणली अशी विचारणा केली असता त्यांनी सागर अरुण पारलेवार रा. कोठारी ता. बल्लारशा जि. चंद्रपूर याच्या जवळून आणल्याचे सांगितले. एलसीबी पथकाने दोघांनाही ताब्यात घेऊन त्यांच्या जवळून ३३ किलो बनावट बियाणे किंमत १ लाख ५ हजार रुपये, सुझुकी ब्रेझा कंपनीची कार (MH ३१ EA ६१९६) तथा मोबाईल असा एकूण ८ लाख १५ हजार रुपयांचा मुद्देमाल जप्त केला आहे.
तसेच शिरपूर पोलिस स्टेशन हद्दीतून एलसीबी पथकाने कृषी विभागाच्या अधिकाऱ्यांना सोबत घेऊन शासनाने प्रतिबंधीत केलेल्या बलवान रिसर्च हायब्रीड कॉटन सिड ५ जी बियाण्यांची अनधिकृत विक्री करणाऱ्या अमोल विजय चिकनकर (३३) रा. वार्ड नं. २ भालर ता. वणी जि. यवतमाळ या आरोपीला ताब्यात घेतले. त्याच्या जवळून प्रतिबंधित कपाशी बियाण्याचे ५ पॉकिट किंमत १८ हजार रुपये असा मुद्देमाल जप्त करण्यात आला आहे.
सदर कार्यवाही जिल्हा पोलिस अधीक्षक डॉ. पवन बन्सोड, अप्पर पोलिस अधीक्षक पियुष जगताप, स्थागुशा पोलिस निरीक्षक आधारसिंग सोनोने, यांच्या मार्गदर्शनात सपोनि अमोल मुडे, पोउपनि रामेश्वर कांडुरे, पोलिस अंमलदार योगेश डगवार, सुधीर पांडे, सुनिल खंडागळे, निलेश निमकर, सुधीर पिदूरकर, रजनीकांत मडावी तसेच कृषी विभागाचे राजेंद्र माळोदे, अमोल जोशी, प्रविण जाधव, कल्याण पाटील यांनी केली
Comments
Post a Comment