अल्पवयीन मुलीवर सामूहिक अत्याचार करणाऱ्या तीन आरोपींना अटक, निर्जनस्थळी नेऊन केला अत्याचार
प्रशांत चंदनखेडे वणी
वासनेने पिसाळलेल्या तरुणांनी एका अल्पवयीन मुलीचे अपहरण करून तिला निर्जनस्थळी नेत तिच्यावर आळीपाळीने बलात्कार केल्याची संतापजनक घटना १७ जूनला घडली. तरुणांनी केलेल्या या कृत्यामुळे मुलगी चांगलीच घाबरली असून तिला मानसिक धक्का बसला आहे. तरुणांच्या अत्याचाराला बळी पडलेल्या या मुलीने शेवटी स्वतःला सावरत पोलिस स्टेशनला येऊन तक्रार नोंदविली. पोलिसांसमोर तिने आपबिती कथन केली. १९ जूनला रात्री पीडित मुलीने तक्रार नोंदविल्यानंतर पोलिसांनी रात्री उशिरापर्यंत आरोपींचा शोध घेऊन तीन आरोपींना अटक केली आहे. अल्पवयीन मुलीवर झालेल्या या अत्याचार प्रकरणाची पोलिसांनी गांभीर्याने दखल घेत अवघ्या काही तासांतच आरोपींना गजाआड केले. त्यांच्यावर अत्याचाराचा गुन्हा दाखल करण्यात आला आहे.
शहरापासून जवळच असलेल्या राजूर (कॉ.) येथील तीन तरुणांनी चायनिजच्या दुकानावर काम करणाऱ्या १६ वर्षीय अल्पवयीन मुलीचे रात्री ऑटोतून अपहरण करून तिला वणी घुग्गुस मार्गावर निर्जनस्थळी नेले. तेथे तिघांनीही या अल्पवयीन मुलीवर आळीपाळीने बलात्कार केला. त्यानंतर परत तिला टिळक चौकात सोडून दिले. तरुणांच्या या कृत्याने मुलगी चांगलीच धास्तावली. तिला काहीही सुचेनासे झाले. शेवटी मानसिक धक्क्यातून स्वतःला सावरत तिने पोलीस स्टेशन गाठले. पोलिसांसमोर आपबिती कथन केली. अत्याचार करणाऱ्या आरोपींविरुद्ध रीतसर तक्रार नोंदविली. पीडित मुलीच्या तक्रारीवरून पोलिसांनी अवघ्या काही तासांतच आरोपींना अटक केली. रात्री उशिरापर्यंत शोध मोहीम राबवून पोलिसांनी अल्पवयीन मुलीच्या असहायतेचा फायदा घेत तिच्यावर सामूहिक बलात्कार करणाऱ्या तीनही नराधमांना गजाआड केले. शंकर उर्फ राकेश नामदेव भोस्कर (२४), राहुल राकेश यादव (२५), शंकर यादव (२८) तिघेही रा. राजूर (कॉ.) अशी या पोलिसांनी अटक केलेल्या हवसखोर तरुणांची नावे आहेत. या तीनही आरोपींवर पोलिसांनी भादंविच्या कलम ३७६, ३६६, ५०६ व बाल लैंगिक प्रतिबंधक कायद्यानुसार (पोक्सो) गुन्हे दाखल केले आहे. या अत्याचार प्रकरणाचा पुढील तपास ठाणेदार अनिल बेहेरानी यांच्या मार्गदर्शनात एपीआय दत्ता पेंडकर करीत आहे.
Comments
Post a Comment