जिल्हा परिषद शाळेचा डोलारा एकाच शिक्षकावर, शाळेला शिक्षक न दिल्यास पंचायत समितीत शाळा भरविण्याचा इशारा

प्रशांत चंदनखेडे वणी 

जिल्हा परिषदेच्या शाळांकडे शिक्षण विभागाचे दुर्लक्ष होतांना दिसत असून शिक्षकांअभावी शिक्षणाचा बट्ट्याबोळ होऊ लागला आहे. शिक्षकांची रिक्त पदे भरण्याकडे शासन पूर्णतः दुर्लक्ष करीत आहे. त्यामुळे जिल्हा परिषदेच्या शाळांमध्ये शिक्षणाचा दर्जा खालावू लागला आहे. शिक्षण विभागाने जिल्हा परिषदेच्या शाळा वाऱ्यावर सोडल्याचे दिसून येत आहे. एकीकडे जिल्हा परिषद शाळा वाचविण्याचा देखावा केला जात आहे. तर दुसरीकडे या शाळाच बंद पाडण्याचा नियोजित प्रयत्न केला जात आहे. जिल्हा परिषदेच्या बहुतांश शाळा एकाच शिक्षकाच्या भरोशावर सुरु आहे. एकच शिक्षक विद्यादानाची जबादारी पार पाडतो आहे. त्यामुळे जिल्हा परिषद शाळेतील शैक्षणिक गुणवत्ता ढासळली आहे. परिणामी पालकांचा कल खाजगी शाळांकडे वाढू लागला आहे. शिक्षकांच्या कमतरतेमुळे विद्यार्थ्यांचं शैक्षणिक नुकसान होत असल्याने नाईलाजास्तव पालकांना खाजगी शाळांची वाट धरावी लागत आहे. प्रत्येक वर्गाचा अभ्यासक्रम वेगवेगळा असतांना सर्व विद्यार्थ्यांना एकाच वर्गात बसवून शिकविण्याची वेळ एका शिक्षकावर आली आहे. तेंव्हा विद्यार्थ्यांना कोणत्या प्रकारचं शिक्षण मिळत असेल याची कल्पना येते. तालुक्यातील निंबाळा (बु.) येथील जी.प. शाळेत कित्येक दिवसांपासून एकाच शिक्षकावर संपूर्ण शाळेचा डोलारा आहे. शाळेला शिक्षक देण्याची मागणी वारंवार करूनही शिक्षक मिळत नसल्याने विद्यार्थ्यांचं मोठं नुकसान होऊ लागलं आहे. त्यामुळे आठ दिवसांत या जी.प. शाळेला शिक्षक न दिल्यास पंचायत समितीमध्येच शाळा भरविण्याचा इशारा शिवसेनेचे (उबाठा) वणी विधानसभा प्रमुख संजय देरकर यांच्या नेतृत्वात गटविकास अधिकारी यांना दिलेल्या निवेदनातून देण्यात आला आहे. 

निंबाळा (बु.) या गावात जिल्हा परिषदेची पहिली ते पाचवी पर्यंत शाळा आहे. या शाळेत एकूण ३२ विद्यार्थी आहेत. वर्ग १ ते ५ पर्यंतच्या सर्व विद्यार्थ्यांना विद्यादान करण्याची जबादारी एकाच शिक्षकावर आहे. अनेक दिवसांपासून या शाळेला अतिरिक्त शिक्षक देण्यात आलेला नाही. त्यामुळे विद्यार्थ्यांचं मोठं नुकसान होऊ लागलं आहे. विद्यार्थ्यांचा शैक्षणिक दर्जा ढासळू लागला आहे. जिल्हा परिषदेचा शिक्षण विभाग याकडे लक्ष द्यायला तयार नाही. अनेक वर्षांपासून शिक्षकांची रिक्त पदे भरण्यात न आल्याने जी.प. शाळेत शिक्षकांचा अभाव दिसून येत आहे. एकच शिक्षक शाळेची काळजी वाहतो आहे. शासनाकडून प्राथमिक शिक्षण सक्तीचे करण्यात आले असतांना व साक्षरता अभियान राबविले जात असतांना शासकीय शाळेतच शिक्षणाची अशी दुरावस्था झाल्याने शासनाचा दुटप्पीपणा समोर येऊ लागला आहे. 

जी.प शाळेची ढासळलेली शैक्षणिक अवस्था बघता शासनाच्या शैक्षणिक धोरणावरच प्रश्न चिन्ह निर्माण होऊ लागले आहे. बहुतांश शाळेत एकच शिक्षक शाळेची धुरा वाहतो आहे. त्यामुळे पालकवर्ग आपल्या पाल्यांच्या शिक्षणाला घेऊन चांगलाच चिंतेत आला आहे. विद्यार्थ्यांची शैक्षणिक प्रगती खालावल्याने जी.प. शाळेत विद्यार्थ्यांची गळती लागली आहे. परंतु ग्रामीण भागातील विद्यार्थ्यांना पर्याय नाही. त्यामुळे त्यांना तेथेच शिक्षण घ्यावे लागत असल्याने त्यांचे शैक्षणिक भवितव्य अंधकारमय होण्याची भीती निर्माण झाली आहे. तालुक्यातील निंबाळा (बु.) येथील जी.प. शाळेत एकच शिक्षक वर्ग १ ते ५ वी च्या विद्यार्थ्यांना शैक्षणिक पाठ गिरवत असल्याने पालकांमधून कमालीचा असंतोष खदखदत आहे. या शाळेला शिक्षक देण्याची गावकऱ्यांमधून सातत्याने मागणी करण्यात येत आहे. त्यामुळे आठ दिवसांत निंबाळा(बु.) येथील जी.प. शाळेला अतिरिक्त शिक्षक देण्यात न आल्यास पंचायत समितीतच शाळा भरविण्याचा इशारा शिवसेनेचे (उबाठा) वणी विधानसभा प्रमुख संजय देरकर यांच्या नेतृत्वात गटविकास अधिकारी यांना देण्यात आलेल्या निवेदनातून दिला आहे. 

निवेदन देतांना सन्मान स्त्री शक्ती फाउंडेशच्या किरण देरकर, ममता पारखी, युवासेना उपजिल्हा प्रमुख अजिंक्य शेंडे, सरपंच अजय कवरसे, प्रविण गोहणे, हरिश्चंद्र डवरे, संदीप मुसळे, अमोल वाघाडे, प्रशांत शेंडे, आकाश आसुटकर ताठ निंबाळा (बु.) येथील नागरिक मोठ्या संख्येने उपस्थित होते.