वर्धा नदी पात्रात आढळला अज्ञात इसमाचा मृतदेह, मृतदेहाची अद्याप पटली नाही ओळख

प्रशांत चंदनखेडे वणी 

वणी तालुक्यातील शेलू गावाजवळून वाहणाऱ्या वर्धा नदी पात्रात अज्ञात इसमाचा मृतदेह आढळून आल्याने एकच खळबळ उडाली. याबाबत पोलिसांना माहिती मिळताच पोलिसांनी तात्काळ घटनास्थळी धाव घेतली. मृतदेह नदीबाहेर काढून मृतदेहाची ओळख पटविण्याचा पोलिसांनी प्रयत्न केला. परंतु मृतक हा कुणाच्याच परिचयाचा न निघाल्याने पोलिसांनी घटनास्थळाचा पंचनामा करून मृतदेह उत्तरीय तपासणी करीता ग्रामीण रुग्णालयात पाठविला. पोलिस मृतकाच्या कुटुंबीयांचा शोध घेण्याचा प्रयत्न करीत आहे. 

२३ ऑक्टोबरला दुपारी ४ वाजताच्या सुमारास शेलू शिवारातील वर्धा नदी पात्रात गावातील काही लोकांना एका अज्ञात इसमाचा मृतदेह आढळून आला. त्यांनी ही माहिती गावचे पोलिस पाटील आवारी यांना दिली. आवारी यांनी वणी पोलिस स्टेशनला कळविले. पोलिसांनी तात्काळ घटनास्थळ गाठून मृतदेह नदीबाहेर काढला. मृतकाची ओळख पटेल असे काहीही त्याच्याजवळ आढळले नाही. घटनास्थळी मृतदेहाची ओळख न पटल्याने पोलिसांनी घटनास्थळाचा पंचनामा करून मृतदेह उत्तरीय तपासणी करीता ग्रामीण रुग्णालयात पाठविला. मृतक हा अंदाजे ५० ते ५५ वर्षे  वयोगटातील असल्याचे सांगण्यात येते. पोलिसांकडून त्याच्या कुटुंबीयांचा शोध घेण्याचा प्रयत्न करण्यात येत आहे. सदर इसमाने नदीत उडी घेऊन आत्महत्या केली की, तो तोल जाऊन नदीत पडला हे अद्याप गुलदस्त्यात असून पोलिस तपासातून ते निष्पन्न होणार आहे. पुढील तपास जमादार संतोष अढाऊ करीत आहे.