शहरात आज पासून दोन दिवसीय बळीराजा व्याख्यानमाला

प्रशांत चंदनखेडे वणी 

शिव महोत्सव समिती वणीच्या विद्यमाने २८ व २९ डिसेंबरला स्थानिक बाजोरिया लॉन येथे बळीराजा व्याख्यानमालेचे आयोजन करण्यात आले आहे. या व्याख्यानमालेचे हे १० वे वर्ष आहे. यावर्षी प्रख्यात साहित्त्यिक व व्याख्याते रंगनाथ पठारे यांना या कार्यक्रमात आमंत्रित करण्यात आलं आहे. त्यांचे मौलिक विचार या व्याख्यानमालेतून ऐकायला मिळणार आहे. रंगनाथ पठारे हे मराठी भाषा विश्वातील प्रथितयश साहित्यिक म्हणून ओळखले जातात. मराठी भाषेला अभिजात दर्जा मिळावा याकरिता महाराष्ट्र सरकारने स्थापित केलेल्या मसुदा समितीचे ते अध्यक्ष राहिले आहेत. आता पर्यंत त्यांच्या १४ कांदबऱ्या व ८ लघुकथा संग्रह प्रकाशित झाले आहेत. त्यांच्या साहित्यावर अनेक विद्यार्थ्यांनी संशोधन करून पिच.डी. केली आहे. रंगनाथ पठारे यांच्या प्रकाशित साहित्याला साहित्य विश्वातील नामांकित संस्था व महाराष्ट्र शासनाचे देखील पुरस्कार मिळाले आहेत. अशा या साहित्य क्षेत्रातील महान व्यक्तिमत्व असलेल्या रंगनाथ पठारे यांची बळीराजा व्याख्यानमालेला विशेषत्वाने उपस्थिती लाभणार आहे.

दोन दिवसीय या व्याख्यानमालेत २८ डिसेंबरला सायंकाळी ६ वाजता रामचंद्र सपाट यांच्या स्मृतीप्रित्यर्थ डॉ. रमेश सपाट यांच्या सौजन्याने पहिले स्मृतीपुष्प गुंफले जाणार आहे. सामाजिक वास्तव : काल, आज आणि उद्या या विषयावर यावेळी विचारमंथन होणार आहे. शिव मोहत्सव समितीचे अध्यक्ष शहाबुद्दीन अजानी यांच्या अध्यक्षतेत होणाऱ्या या कार्यक्रमात तहसीलदार निखिल धुळधर, पोलिस निरीक्षक अनिल बेहेरानी, मराठा सेवा संघाचे तालुकाध्यक्ष अंबादास वागदरकर, न्यू माजरी केंद्रीय विद्यालयाचे प्राचार्य चंद्रमणी धोटे, सहाय्यक महसूल अधिकारी जितेंद्र पाटील, अस्थिरोग तज्ज्ञ डॉ. राम कात्रे, विधिज्ञ ऍड. विजया मांडवकर-शेळकी, न. प. शाळा क्रमांक ९ च्या मुख्याध्यापिका वेणू कोटरंगे यांची प्रमुख अतिथी म्हणून उपस्थिती राहणार आहे. 

२९ डिसेंबरला सायंकाळी ६ वाजता सांबशिव देवडे यांच्या स्मृतप्रित्यर्थ राजेंद्र देवडे यांच्या सौजन्याने दुसरे स्मृतिपुष्प गुंफले जाणार आहे. साहित्य कशासाठी या विषयावर यावेळी विचार मंथन होणार आहे. या कार्यक्रमाला उपविभागीय अधिकारी नितीनकुमार हिंगोले, एसडीपीओ गणेश किंद्रे, डीएव्ही स्कुल सुंदरनगरचे प्राचार्य मनोज कारेमोरे, एकविरा महिला पतसंस्थेच्या अध्यक्षा किरण देरकर, एनबीएसएस वुमेन्स लॉ कॉलेज बुरांडाच्या प्राचार्य ऍड. हमिरा शरीफ, विवेकानंद विद्यालयाचे से.नि. पर्यवेक्षक प्रविण इंगोले, आदिवासी प्रबोधन मंचचे संस्थापक सुभाष आडे, संभाजी ब्रिगेडचे जिल्हाध्यक्ष अजय धोबे यांची प्रामुख्याने उपस्थिती लाभणार आहे. शहरात आयोजित या दोन दिवसीय बळीराजा व्याख्यानमालेत प्रख्यात साहित्यिक व व्याख्याते रंगनाथ पठारे यांचे जीवनाला दिशा देणारे विचार ऐकायला मिळणार आहेत. तेंव्हा या कार्यक्रमाला नागरिकांनी मोठ्या संख्येने उपस्थिती दर्शविण्याचे आवाहन शिव महोत्सव समितीचे उपाध्यक्ष प्रा. डॉ. करमसिंग राजपूत, निमंत्रक कृष्णदेव विधाते व शिव महोत्सव समितीने केले आहे.