प्रशांत चंदनखेडे वणी
माहिती व तंत्रज्ञानाच्या या युगात जग अधिक वेगवान होत आहे. यातूनच स्पर्धा वाढतेय. मुलांना वैज्ञानिक क्षेत्रातील नाविण्यपूर्ण घडामोडींची माहिती करुन देणे व त्यातून विद्यार्थ्यामध्ये वैज्ञानिक दृष्टीकोन वाढीस लावणे ही काळाची गरज असल्याचे प्रतिपादन वणीचे गटशिक्षणाधिकारी स्नेहदिप काटकर यांनी केले. तालुकास्तरीय विज्ञान प्रदर्शनीच्या समारोप समारंभात ते बोलत होते.
पंचायत समिती वणी व मॅकरून स्टुडंट्स अकॅडमी यांच्या संयुक्त विद्यमाने मॅकरून स्टुडंट्स अकॅडमी वडगाव येथे ५२ वी दोन दिवसीय तालुकास्तरीय विज्ञान प्रदर्शनी ९ व १० डिसेंबरला आयोजित करण्यात आली. या विज्ञान प्रदर्शनीचा समारोप समारंभ अतिशय उत्साहात पार पडला. कार्यक्रमाच्या अध्यक्षस्थानी गटशिक्षणाधिकारी स्नेहदिप काटकर हे होते. तर मॅकरून शाळेच्या मुख्यध्यापिका शोभना, सुनंदा आस्वले, होमराज पटेल, प्रसन्ना जोशी व अजय राजूरकर हे प्रामुख्याने उपस्थित होते. ग्रामीण भागातून भावी वैज्ञानिक तयार व्हावा यासाठी बाल वयातच त्यांच्यात वैज्ञानिक दृष्टिकोन निर्माण करण्याच्या उद्देशाने ही विज्ञान प्रदर्शनी घेण्यात आल्याचे मनोगत मॅकरून शाळेच्या मुख्याध्यापिका शोभना यांनी यावेळी व्यक्त केले.
सुनंदा आस्वले यांनी याप्रसंगी मार्गदर्शन करतांना म्हटले की, विज्ञान हा विषय मुलांमध्ये कुतुहल वाढवितो. तसेच यात विविध प्रयोग असल्यामुळे मुलांना नाविण्याचा ठाव घेता येतो. वैद्यकिय व माहिती तंत्रज्ञान क्षेत्र यासोबतच सर्व क्षेत्रातील नाविन्यपूर्ण शोधाचे व संशोधनाचे अधिष्ठान विज्ञान आहे. त्यामुळे ग्रामीण भागातील मुलांमध्ये विज्ञान विषयाची आवड निर्माण करण्यासाठी अशा प्रकारच्या विज्ञान प्रदर्शनांची नितांत आवश्यकता आहे. यातूनच मुलांमध्ये भावी वैज्ञानिक होण्याची भावना जागृत होईल.
या तालुकास्तरीय विज्ञान प्रदर्शनीमध्ये सहावी ते आठवी उच्च प्राथमिक गट आणि नववी ते बारावी माध्यमिक आणि उच्च माध्यमिक गट अशा दोन गटात स्पर्धा घेण्यात आल्या. तसेच शिक्षकांसाठी प्राथमिक शिक्षक (पहिली ते आठवी), माध्यमिक व उच्च माध्यमिक शिक्षक (नववी ते बारावी) आणि प्रयोगशाळा परिचर यांचा स्वतंत्र गट होता. प्रदर्शनीचा मुख्य विषय शाश्वत विकासासाठी विज्ञान व तंत्रज्ञान हा होता. तर उप विषयात शाश्वत कृषीपद्धती, स्वच्छता आणि आरोग्य, संसाधन व्यवस्थापन, औद्योगिक विकास, भविष्यकालीन परिवहन, संचार व शैक्षणिक खेळ आणि गणितीय प्रतिकृती यांचा समावेश होता.
यावेळी विविध केंद्रातील केंद्रप्रमुख तसेच गटसाधन केंद्र वणीचे कर्मचारी उपस्थित होते. विज्ञान प्रदर्शनात उच्च प्राथमिक विभागात वर्ग 6 ते 8 च्या विद्यार्थ्यांनी 47 प्रतिकृती, उच्च माध्यमिक विभागात वर्ग 9 ते 12 च्या विद्यार्थ्यांनी 20 प्रतिकृती, शिक्षक व प्रयोगशाळा सहाय्यक गटात 2 प्रतिकृती अशा एकूण 82 प्रतिकृती सादर करण्यात आल्या. या विज्ञान प्रदर्शनीमध्ये 68 शाळांनी सहभाग घेतला होता. सदर प्रतिकृतींचे मूल्यमापन सुनंदा आस्वले, होमराज पटेलपैक, प्रसन्ना जोशी व अजय राजूरकर यांनी केले. सर्व विजेत्या स्पर्धकांना यावेळी गटशिक्षणाधिकारी स्नेहदिप काटकर व मॅकरून शाळेच्या मुख्यध्यापिका शोभना यांच्या हस्ते प्रमाणपत्र, शिल्ड व पुष्पगुच्छ देऊन गौरविण्यात आले. कार्यक्रमाचे सुत्रसंचालन रुपाली घाटे यांनी तर आभार प्रदर्शन निशा वाटेकर यांनी केले. कार्यक्रमाच्या यशस्वितेसाठी समस्त शिक्षक व शिक्षकेत्तर कर्मचाऱ्यांनी परिश्रम घेतले.
.jpg)
No comments: