बेपत्ता युवकाचा गळफास घेतलेल्या अवस्थेत आढळला मृतदेह

प्रशांत चंदनखेडे वणी 

घरून बेपत्ता असलेल्या युवकाचा अखेर भुरकी शिवारात पिंपळाच्या झाडाला गळफास घेतलेल्या अवस्थेत मृतदेहच आढळून आला. ही घटना सोमवार दि. २३ डिसेंबरला दुपारी ३ वाजताच्या सुमारास उघडकीस आली. अर्जुन हरिभाऊ काळे (२८) रा. तेलीफैल असे या गळफास घेतलेल्या युवकाचे नाव आहे. 

मृतक अर्जुन काळे हा १८ डिसेंबरला सायंकाळी ४ वाजता कुणालाही न सांगता घरून निघून गेला. तो बराच वेळ होऊनही घरी न परतल्याने त्याचा सर्वत्र शोधाशोध घेतल्यानंतर १९ डिसेंबरला तो घरून बेपत्ता झाल्याची पोलिस स्टेशनला तक्रार नोंदविण्यात आली. पोलिस त्याचा शोध घेत असतांनाच आज तो वणी तालुक्यातील भुरकी शिवारात वर्धा नदीच्या काठावर पिंपळाच्या झाडाला दोरीने गळफास घेतलेल्या अवस्थेत आढळून आला. ही माहिती पोलिसांना मिळताच पोलिसांनी तात्काळ घटनास्थळ गाठले. घटनास्थळाचा पंचनामा करून मृतदेह उत्तरीय तपासणी करीता ग्रामीण रुग्णालयात पाठविला. अर्जुन काळे हा शहरातील तेलीफैल येथे वास्तव्यास होता. तो मिस्त्री काम करून आपला उदरनिर्वाह करायचा. १८ डिसेंबरला तो अचानक घरून बेपत्ता झाला, व आज २३ डिसेंबरला त्याचा गळफास घेतलेल्या अवस्थेत मृतदेहच आढळून आला. त्याने गळफास घेऊन आत्महत्या केली की प्रकरण काही वेगळं आहे. याचा तपास पोलिस करीत आहे.