वेकोलिच्या नागपूर सुरक्षा समितीच्या सदस्यपदी संजय खाडे यांची नियुक्ती

प्रशांत चंदनखेडे वणी 

वेकोलि नागपूर सुरक्षा समितीच्या सदस्यपदी संजय खाडे यांची नियुक्ती करण्यात आली. त्यानिमित्त शहरातील एएसएल लॉन येथे कोयला श्रमिक सभा वणी क्षेत्राच्या वतीने अभिनंदन सोहळा घेण्यात आला. या कार्यक्रमाला हिंद मजूर सभा (HMS) युनियनचे पदाधिकारी उपस्थित होते. तसेच वणी क्षेत्रातील मान्यवरांनी देखील या कार्यक्रमाला उपस्थिती दर्शविली. जनतेचे प्रश्न व समस्या सोडविण्याकरिता प्रखरतेने पुढे येणाऱ्या संजय खाडे यांची वेकोलिच्या महत्वपूर्ण पदावर नियुक्ती झाल्याने जनतेतून समाधान व्यक्त करण्यात येत आहे. संजय खाडे यांनी यावेळी आपल्या प्रतिक्रिया व्यक्त म्हटले की, वेकोलि कर्मचारी व वेकोलि क्षेत्रातील समस्या सोडविण्याकरिता आपण सर्वोतपरी प्रयत्न करणार आहोत. त्यांनी आपल्या नियुक्तीचे श्रेय एचएमएस संघटनेचे राष्ट्रीय उपाध्यक्ष शिवकुमार यादव यांना दिले. 

कार्यक्रमाला एचएमएस संघटनेचे राष्ट्रीय उपाध्यक्ष व कोयला श्रमिक सभेचे अध्यक्ष शिवकुमार यादव, शरद धांडे, (महामंत्री व संचालन समिती सदस्य वेकोलि), दीपक जयस्वाल (कोषाध्यक्ष व अध्यक्ष वेकोलि वणी क्षेत्र), विकास सोनटक्के (महामंत्री वेकोलि वणी क्षेत्र) हे प्रामुख्याने उपस्थित होते. या वेळी उपस्थित मान्यवरांनी कामगारांचे हक्क, कामगार कल्याण व संघटनेच्या मजबुतीवर चर्चा केली. मोठ्या पदामुळे आता जबाबदारी वाढली असल्याचे सांगतानाच वेकोलिच्या सर्व स्तरातील कर्मचाऱ्यांच्या समस्या सोडवण्यासाठी तथा खान बाधित क्षेत्रातील समस्या सोडवण्यासाठी पुरेपुर प्रयत्न करणार असल्याचे संजय खाडे यांनी यावेळी सांगितले. कार्यक्रमाला वेकोलिच्या कोळसाखाणीतील कर्मचारी मोठ्या संख्येने उपस्थित होते. संजय खाडे यांच्या नियुक्तीमुळे वेकोलि कर्मचारी वर्गात उत्साहाचे वातावरण असून वेकोलिच्या जबाबदारीच्या पदावर त्यांची नियुक्ती झाल्याने त्यांच्यावर सर्वच स्तरातून अभिनंदनाचा वर्षाव होत आहे.