नैराश्येतून तरुणाने घेतला गळफास

प्रशांत चंदनखेडे वणी 

तालुक्यातील बेसा (लाठी) येथील तरुणाने राहत्या घरी गळफास घेऊन आत्महत्या केल्याची घटना ६ जानेवारीला दुपारी ४ वाजताच्या सुमारास उघडकीस आली. घरी कुणी नसतांना त्याने घराच्या खोलीत गळफास लावून आपली जीवनयात्रा संपविली. विनीत शैलेश वाघमारे (२२) असे या गळफास घेतलेल्या तरुणाचे नाव आहे. 

बेसा (लाठी) येथे आई व लहान भावासोबत राहत असलेल्या तरुणाने नैराश्येतून मृत्यूला कवटाळले. आई शेतात तर लहान भाऊ प्रशिक्षण वर्गाकरिता गेला असतांना त्याने राहत्या घरी गळफास लावून आत्महत्या केली. कुटुंबाचा प्रमुख आधार असलेल्या या तरुणाने आत्मघात केल्याने कुटुंबावर दुःखाचा डोंगर कोसळला आहे. विनीत हा शिक्षण घेतांनाच खाजगी क्षेत्रात नोकरीही करायचा. घरातील तो कर्ता तरुण होता. कुटुंबाची सर्व जबाबदारी तो पार पाडायचा. या कर्तबगार तरुणाने विवंचनेतून टोकाचे पाऊल उचलले. घरी कुणी नसतांना त्याने गळफास घेऊन जगाचा निरोप घेतला. आयटीआयचे शिक्षण घेत असलेला लहान भाऊ जेंव्हा घरी परतला तेंव्हा त्याला मोठा भाऊ गळफास घेतलेल्या अवस्थेत आढळून आला. त्याने लगेच ही माहिती आपल्या आईला व घराजवळ राहत असलेल्या नातेवाईकांना दिली. नंतर ही माहिती पोलिसांना देण्यात आली. पोलिसांनी पंचनामा करून मृतदेह उत्तरीय तपासणी करीता ग्रामीण रुग्णालयात पाठविला. आज मृतदेहाचे शवविच्छेदन झाल्यानंतर मृतदेह अंतिम संस्काराकरिता कुटुंबियांच्या स्वाधीन करण्यात येणार आहे. तरुणाच्या आत्महत्येचे नेमके कारण अद्याप कळू शकले नाही. पुढील तपास पोलिस करीत आहे.