टायर पंचर दुरुस्तीचे दुकान असलेल्या तरुणाचा अभिनय क्षेत्रातील थक्क करणारा प्रवास
प्रशांत चंदनखेडे वणी
स्वप्न तर सगळेच बघतात, पण स्वप्नांना वास्तवात उतरविण्याची जिद्द बाळगल्यास स्वप्नांच्या क्षितिजापलीकडे जाण्याचा मार्ग मोकळा होतो. स्वप्न साकार व स्वप्नांना आकार देण्याचं सामर्थ्य अंगी असेल तरच यशस्वी जीवनाची वाट गवसते. स्वप्नांना प्रयत्नांची किनार मिळाली की, स्वप्नवत वाटणाऱ्या जगातही पाऊल ठेवता येतं. जीवनात अशक्य असं काहीच नाही, पण ते साध्य करण्याची जिद्द माणसात असली पाहिजे. स्वप्न सर्वांनाच खुणावतात पण स्वप्नांचा पाठलाग करणारा माणूसच जीवनात यशस्वी होतो. ते म्हणतात ना "मंझिल उन्ही को मिलती है, जिनके सपनो मे जान होती है, पंखों से कुछ नही होता, हौसलों से उडान होती है,"।
अशाच एका धेय्यवेड्या तरुणाने स्वप्नवत वाटणाऱ्या चंदेरी दुनियेत आपलं पाऊल रोवलं आहे. त्याने स्वप्न बघितली आणि ती साकारही करून दाखविली. अभिनेता बनण्याचं त्याचं स्वप्न हळू हळू साकार होतांना दिसत आहे. चित्रपटात अभिनय करण्याची महत्त्वाकांक्षा त्याच्या अंतरमनात ठायी ठायी रुजली होती. अभिनय करण्याच्या इच्छाशक्तीने झपाटलेला हा तरुण छोट्या पडद्यावरील भूमिकेसाठी ऑडिशन देऊ लागला. अशातच त्याची स्वप्नपूर्तीकडे वाटचाल सुरु झाली. त्याच्या अपार प्रयत्नानंतर त्याला नेटफ्लिक्स वरील वेबसिरीजमध्ये अभिनयाची संधी मिळाली. त्यानंतर त्याने मागे वळून बघितलेच नाही. तो अभिनयाच्या दुनियेत एक एक पाऊल पुढे टाकत गेला. त्याच्या कौशल्याची चमक सर्वांचेच डोळे दिपवणारी ठरली. आणि कसदार अभिनयामुळे त्याला एका मराठी चित्रपटात भूमिका साकारण्याची संधी मिळाली. त्याने स्वप्नांचा सुरु केलेला प्रवास वास्तवात उतरला. आणि आपल्या प्रयत्नातून त्याने स्वप्नाच्या पलीकडची दुनिया गाठली. त्यातच आनंदाची बाब म्हणजे त्याच्या स्वप्नांचं सोनं करणारा क्षण साकारला आहे. त्याच्या सुंदर अशा अभिनयाने साकारलेला मराठी अल्बम तयार झाला असून या अल्बमचं एक हृदयस्पर्शी गीत नुकतंच रिलीज झालं आहे. या धेय्यवेड्या तरुणाने सुरु केलेला चंदेरी दुनियेचा हा अनपेक्षित प्रवास यशस्वी वळणावर पोहचला आहे.
त्यानंतर तो आता लवकरच "पल्याड रावसाहेब" या मराठी चित्रपटात झळकणार आहे. आणि त्यातच आनंदाची गोष्ट म्हणजे शुभमच्या अभिनयाने साकारलेला पहिला मराठी अल्बम तयार झाला असून या अल्बम मधील "तू दिसता" हे हृदयस्पर्शी गीत नुकतंच रिलीज झालं आहे. या तरुणाने जिद्द व परिश्रमाने अभिनय क्षेत्रात निर्माण केलेलं अस्तित्व वणीच्या शिरपेचात मानाचा तुरा रोवण्यासारखं आहे. कौशल्य तर सर्वातच असतं, कौशल्याच्या जोरावर नावलौकिकही मिळविता येतं, पण कौशल्य दाखविण्यासाठी परिश्रम घेणं सर्वांनाच शक्य होत नाही. ते शुभम सारखे दृढनिश्चयी तरुणच करू शकतात. परिस्थितीचं रडगाणं गाणाऱ्यांकरिता शुभमच्या जिद्द व परिश्रमाची ही प्रेरणावाट बोध घेण्यासारखी आहे. असाध्य असं काहीच नसतं, फक्त ते साध्य करण्याची जिद्द उरात पेटली पाहिजे. शुभम उगले या तरुणाची प्रेरणादायी वाटचाल खरंच आदर्श घेण्यासारखी आहे. "तूच आहे तुझ्या जीवनाचा शिल्पकार" हे महापुरुषाचे चिरंतर विचार शुभमच्या या यशोगाथेमुळे सार्थकी ठरल्यासारखे वाटतात.
शुभम आहे कुठला? काय वणीचा आहे?
ReplyDelete