पूर्व वैमनस्यातून दोघांनी एकाला लोखंडी रॉडने मारून केले जखमी

प्रशांत चंदनखेडे वणी 

पूर्व वैमनस्यातून दोघांनी एकाला लोखंडी रॉडने मारून जखमी केल्याची घटना २३ एप्रिलला दुपारी १२ वाजता दीपक चौपाटी परिसरात घडली. याबाबत पोलिस स्टेशनला देण्यात आलेल्या तक्रारी वरून पोलिसांनी आरोपींवर गुन्हा दाखल केला आहे. 

शहरातील खडबडा मोहल्ला येथे राहणारा फिरोज खान ताहीर खान (४४) हा विनर्स बियरबारमध्ये काम करतो. सात महिन्यांपूर्वी गोकुळनगर येथे राहणारे अनिल हिरामन घोगरे (२४) व योगेश कैलास घोगरे (२२) यांनी विनर्स बियरबारमध्ये येऊन विनाकारण धिंगाणा घातला होता. हे दोघेही बियरबारमध्ये गोंधळ घालत असतांना त्यावेळी फिरोज खान ताहीर खान याने दोघांनाही बियरबारच्या बाहेर काढले होते. तो राग मनात ठेऊन या दोघांनी फिरोज खान ताहीर खान याला दीपक चौपाटी परिसरात लोखंडी रॉडने जबर मारहाण केली. 

फिरोज खान हा २३ एप्रिलला दुपारी १२ वाजता दीपक चौपाटी परिसरातून जात असतांना अनिल व योगेशने त्याला अडविले. सात महिन्यांपूर्वी तु आम्हाला बियरबारच्या बाहेर काढले होते, असे म्हणत या दोघांनीही त्याला लोखंडी रॉडने मारहाण करण्यास सुरवात केली. लोखंडी रॉड फिरोज खान याच्या हातावर व डोक्यावर मारण्यात आल्याने तो जखमी झाला आहे. जुना वाद उकरून काढत या दोघांनी सात महिन्यानंतर सूड उगविल्याने भयभीत झालेल्या फिरोज खान याने सरळ पोलिस स्टेशन गाठून या दोघांविरुद्ध तक्रार नोंदविली. फिरोज खान याच्या तक्रारी वरून पोलिसांनी अनिल घोगरे व योगेश घोगरे या दोनही आरोपींवर बीएनएसच्या कलम ११८(१), ३५१(२), ३५१(३), ३५२ नुसार गुन्हा दाखल केला आहे. पुढील तपास पोलिस करीत आहे.