जुन्या वादातून जितेंद्रला लाकडी दांड्याने मारून केले जखमी

प्रशांत चंदनखेडे वणी 

जुन्या वादाचा वचपा काढत एकाने दुसऱ्याला लाकडी दांड्याने मारून जखमी केल्याची घटना १९ एप्रिलला सायंकाळी ५.३० वाजताच्या सुमारास शहरातील खडबडा मोहल्ला येथे घडली. याबाबत पोलिस स्टेशनला देण्यात आलेल्या तक्रारी वरून पोलिसांनी मारहाण करणाऱ्यावर गुन्हा दाखल केला आहे. 

तालुक्यातील लालगुडा (नविन) येथे राहणाऱ्या जितेंद्र महादेव डहाके (४०) याचा तीन वर्षांपूर्वी शहरातील खडबडा मोहल्ला येथे राहणाऱ्या शंकर किनाके (३२) या युवकासोबत वाद झाला होता. विशेष म्हणजे हे दोघेही एकमेकांचे चांगले सोबती होते. सोबतच मजुरीची कामेही करायचे. आपसात सलोख्याचे संबंध असतांना अचानक काही कारणांवरून त्याच्यात वाद निर्माण झाला. त्यावेळी या दोघांमध्ये चांगलेच भांडण झाले होते. तो राग शंकर किनाके याने मनात धरून ठेवला. १९ एप्रिलला जितेंद्र हा खडबडा मोहल्ला येथील लक्ष्मण कोमरेड्डीवार यांच्या किराणा दुकानाजवळ उभा असतांना शंकर किनाके हा त्याच्या जवळ आला व जुना वाद उकरून काढत त्याला शिवीगाळ करू लागला. 

शंकर हा शिवीगाळ करीत असतांना जितेंद्र याने शिवीगाळ कशाला करतो, असे म्हणताच शंकरने लाकडी दांड्याने त्याला मारहाण करण्यास सुरवात केली. शंकरने जितेंद्रच्या डोक्यावर, दोन्ही पायांवर व कंबरेवर लाकडी दांड्याने मारहाण केल्याने जितेंद्र जखमी झाला. त्यामुळे त्याने पोलिस स्टेशन गाठून झालेल्या मारहाणीबाबत तक्रार नोंदविली. जितेंद्र डहाके याच्या तक्रारी वरून पोलिसांनी आरोपी शंकर किनाके याच्यावर बीएनएसच्या कलम ११८(१), ३५१(२), ३५१(३), ३५२ नुसार गुन्हा दाखल केला आहे. पुढील तपास पोलिस करीत आहे.