इसमाचा विवस्त्र अवस्थेत आढळला मृतदेह, खुन झाल्याचा बांधण्यात येत आहे अंदाज

प्रशांत चंदनखेडे वणी :-

वणी तालुक्यातील वाघदरा ग्रामपंचायत हद्दीत मांडवकर बियरबारच्या मागे एका व्यक्तीचा विवस्त्र अवस्थेत मृतदेह आढळून आल्याने एकच खळबळ उडाली. या व्यक्तीच्या चेहऱ्यावर प्रचंड जखमा आढळून आल्याने त्याचा दगडाने ठेचून खून करण्यात आल्याचा प्राथमिक अंदाज व्यक्त करण्यात येत आहे. प्रथमदर्शनी ही खुनाची घटना असल्याचे समोर आले आहे. देवराव दत्तू गुंजेकर वय अंदाजे ५० ते ५५ वर्षे रा. लालगुडा (नवीन) ता. वणी असे या खून झालेल्या इसमाचे नाव आहे. 

मृतक देवराव गुंजेकर हा गल्लीबोळात फिरून भंगार वेचण्याचं काम करायचा. तो दारूचाही प्रचंड व्यसनी असल्याचे सांगण्यात येते. त्याच्या सोबत त्याचा परिवार नव्हता. पण त्याची भाची त्याच्यासोबत राहत असल्याचे समजते. तो वेगवेगळ्या ठिकाणी किरायाच्या घरात राहायचा. दोन महिन्यांपूर्वी तो वाघदरा येथून नवीन लालगुडा येथे एका किरायाच्या घरात राहायला गेला होता. सोमवार १८ ऑगस्टला सकाळी त्याचा विवस्त्र अवस्थेत मृतदेह आढळून आला. मॉर्निंग वॉक करणाऱ्या महिलांना वणी चारगाव चौकी मार्गावरील मांडवकर बियरबारच्या मागे हा इसम रक्ताच्या थारोळ्यात पडून दिसला. नंतर ही वार्ता वाऱ्यासारखी परिसरात पसरली. त्यामुळे घटनास्थळी बघ्यांची एकच गर्दी उसळली होती. 

दरम्यान ही माहिती पोलिसांना देण्यात आली. पोलिसांनी तात्काळ घटनास्थळ गाठले. मृतक हा पाठमोऱ्या अवस्थेत पडला होता. पोलिसांनी त्याला सरळ केल्यानंतर त्याच्या चेहऱ्यावर प्रचंड जखमा आढळून आल्या. त्यामुळे आपसी वादातून अज्ञात मारेकऱ्याने त्याचा दगडाने ठेऊन खून केला असावा, असा प्राथमिक अंदाज बांधण्यात आला आहे. मात्र एका भंगार वेचणाऱ्याचा खून करण्याइतपत असा कोणता टोकाचा वाद झाला असावा, ही चर्चा परिसरात रंगली आहे. त्यातच विवस्त्र अवस्थेत या इसमाचा मृतदेह आढळल्याने परिसरात चर्चांना उधाण आले आहे. या खून प्रकरणाचा उलगडा करण्याचे मोठे आव्हान पोलिसांसमोर उभे ठाकले आहे. पोलिसांनी घटनास्थळाचा पंचनामा करून मृतदेह उत्तरीय तपासणी करीता ग्रामीण रुग्णालयात पाठविला आहे. घटनेचा पुढील तपास ठाणेदार गोपाल उंबरकर यांच्या मार्गदर्शनात पोलिस करीत आहे.