जीवनगाण्याची सुरेल भेट : माधवराव सरपटवार यांच्या कार्याचा गौरवमहोत्सव

प्रशांत चंदनखेडे वणी :-

मानवी आयुष्य हे एक गाणे असते – कधी राग, कधी आलाप, कधी सूर जुळणारे, तर कधी विसंगतही. पण या सगळ्यातून जर कुणी आयुष्याचे ‘जीवनगाणे’ घडवले असेल, तर त्याची स्वरकळा पिढ्यान्पिढ्या गुणगुणली जाते. अशाच स्वरांचा दस्तऐवज ठरलेले “माझे जीवन गाणे” हे पुस्तक, वणीचे ज्येष्ठ व्यक्तिमत्व, सेवानिवृत्त मुख्याध्यापक आणि साहित्यप्रेमी माधवराव सरपटवार यांच्यावर साकारले गेले असून, त्याचा प्रकाशन सोहळा नुकताच शहरवासीयांच्या साक्षीने पार पडला.

या सोहळ्यात माधवराव सरपटवार यांना सन २०२५ चा जैताई मातृगौरव पुरस्कार प्रदान करण्यात आला. पुरस्काराचे हे सोन्याहून पिवळे पान त्यांच्या जीवनपुस्तकात जोडले गेले.

✦ मान्यवरांची उपस्थिती

समारंभाला दैनिक तरुण भारतचे मुख्य संपादक शैलेश पांडे, विदर्भ साहित्य संघाचे अध्यक्ष प्रदीप दाते, उद्योगपती आशुतोष शेवाळकर, माजी आमदार संजीवरेड्डी बोदकुरवार, नागपूरचे ख्यातनाम चिकित्सक डॉ. सौरभ बरडे, विद्यावाचस्पती प्रा. स्वानंद पुंड, संपादक सुनील इंदुवामन ठाकरे, सामाजिक कार्यकर्ते विजय चोरडिया यांची प्रकर्षाने उपस्थिती लाभली.

✦ पुस्तकाचे वैभव

या पुस्तकाला ख्यातनाम साहित्यिक शैलेश पांडे यांची प्रस्तावना लाभली असून, निर्मिती प्रक्रियेवरील परिश्रमाचे शब्दांकन सुनील ठाकरे यांनी केले आहे.

सजावट, मुखपृष्ठ, रेखाटन, मांडणी या सर्वांमधून सरपटवार परिवाराचा आत्मीय सहभाग दिसून येतो.

लेख, पत्रव्यवहार, कविता आणि आठवणींच्या ओघातून ‘माझे जीवन गाणे’ हे केवळ एक पुस्तक न राहता, एका व्यक्तिमत्त्वाच्या सांस्कृतिक व सामाजिक प्रवासाचे जिवंत चित्र उभे करणाऱ्या कल्पकतेचे हे सुंदर लेखन आहे.

✦ सोहळ्याची रंगत

कार्यक्रमाचे प्रास्ताविक प्रा. स्वानंद पुंड यांनी केले, तर प्रा. चंद्रकांत अणे यांनी आभार मानले. संयोजनाची सूत्रधार भूमिका सागर मुने यांनी निभावली.

सभागृहात जमलेल्या साहित्यप्रेमींच्या डोळ्यात समाधानाची चमक होती. माधवराव सरपटवार यांच्या जीवनकृतीचा गौरव करताना प्रत्येक वक्त्याने त्यांच्या कार्याचा सूर आपल्या शब्दात ओवला आणि “जीवनगाणे” खऱ्या अर्थाने रसिकांच्या हृदयाला भिडले.