🟠 संत नामदेव महाराज राष्ट्रीय एकात्मता विश्व महासंमेलन, २२ फेब्रुवारीला नागपूरच्या रेशीमबाग मैदानावर भव्य आयोजन

प्रशांत चंदनखेडे वणी :-

संत शिरोमणी नामदेव महाराज यांच्या समतेचा, भक्तीचा व एकात्मतेचा विचार देशभर पोहोचवण्याच्या तसेच शिंपी समाजाची राष्ट्रीय पातळीवरील संघटनशक्ती अधिक बळकट करण्याच्या उद्देशाने संत नामदेव महाराज राष्ट्रीय एकात्मता विश्व महासंमेलन दिनांक २२ फेब्रुवारी २०२६ रोजी नागपूर येथील रेशीमबाग मैदानावरील संत शिरोमणी नामदेव महाराज स्मारक परिसरात आयोजित करण्यात आले आहे.

या ऐतिहासिक महासंमेलनासाठी संपूर्ण भारतातील शिंपी समाजाने मोठ्या संख्येने सहभागी व्हावे, यासाठी सुशिल बोबडे महाराज (पुणे) यांनी देशव्यापी जनजागृती दौरा सुरू केला आहे. आंध्र प्रदेश, तेलंगणा, महाराष्ट्र, पंजाबसह विविध राज्यांमध्ये भ्रमण करत महाराज शिंपी समाजातील बांधवांना नागपूर येथे होणाऱ्या महासंमेलनासाठी उपस्थित राहण्याचे आवाहन करीत आहेत.

या दौऱ्याच्या निमित्ताने महाराजांचे वणी-झरी-मारेगाव तालुक्यातील वैष्णव शिंपी सामाजिक बहुउद्देशीय संस्थाचे अध्यक्ष मोरेश्वर उज्वलकर यांच्या निवासस्थानी आगमन झाले. यावेळी समाजातील विविध पदाधिकारी, कार्यकर्ते व नागरिक उपस्थित होते. महाराजांनी आपल्या मार्गदर्शनात समाज संघटन, स्वाभिमानाची जाणीव आणि भविष्यातील ऐतिहासिक निर्णयांसाठी सज्ज राहण्याचा संदेश दिला.

याप्रसंगी विदर्भ शिंपी समाज मंडळाचे कार्याध्यक्ष मोरेश्वर उज्वलकर यांनी संपूर्ण शिंपी समाजाला आवाहन करताना सांगितले की,

“शिंपी समाजाच्या शक्तीचे, सन्मानाचे आणि एकतेचे भव्य दर्शन घडवण्यासाठी २२ फेब्रुवारी २०२६ रोजी नागपूर येथे प्रत्येक शिंपी बांधवाने उपस्थित राहावे.”

संपूर्ण महाराष्ट्रासह देशभरात ऐक्य, संघटन आणि स्वाभिमानाचा ऐतिहासिक संदेश घेऊन सुरू असलेला सुशिल बोबडे महाराजांचा हा दौरा समाजात नवचैतन्य निर्माण करत असून, नागपूर येथील महासंमेलन शिंपी समाजाच्या इतिहासातील एक महत्त्वाचा व निर्णायक टप्पा ठरेल, असा विश्वास व्यक्त करण्यात येत आहे