🔺प्रचंड मंथनातून घडलेले संविधानिक कायदे आज सत्ताधाऱ्यांकडून बदलले जात आहेत – प्रभू राजगडकर

प्रशांत चंदनखेडे वणी :-

“जगाच्या इतिहासाने हे वारंवार सिद्ध केले आहे की, जनतेने शोषणाविरोधात उभे राहत संघर्ष केला तेव्हाच सत्ताधाऱ्यांना कायदे करून अधिकार द्यावे लागले. भारतातही संविधानाच्या माध्यमातून सर्वसामान्य जनतेला व्यापक अधिकार मिळाले. विशेषतः आदिवासी, दलित व वंचित घटकांचे शोषण थांबावे व त्यांना समानतेची संधी मिळावी, यासाठी संविधानिक कायदे अस्तित्वात आले. मात्र स्वातंत्र्याच्या ७५ वर्षांनंतरही आपण निवडून दिलेली सरकारेच समताधिष्ठित कायदे बदलून भांडवलदारांच्या हिताचे कायदे करीत आहेत,” असे ठाम प्रतिपादन प्रागतिक विचारवंत व लेखक प्रभू राजगडकर यांनी केले.

ते कॉ. शंकरराव दानव यांच्या द्वितीय स्मृतिदिनानिमित्त वणी येथे आयोजित “कॉ. शंकरराव दानव : व्यक्तित्व आणि संघर्ष” या एकदिवसीय वैचारिक प्रबोधन कार्यक्रमात प्रमुख वक्ते म्हणून बोलत होते. हा कार्यक्रम ३१ जानेवारी २०२६ रोजी वणी येथील वसंत जिनिंग सभागृहात पार पडला. या कार्यक्रमाचे उद्घाटन वसंत जिनिंगचे अध्यक्ष प्रमोद वासेकर यांच्या हस्ते झाले. तर अध्यक्षस्थानी कॉ. ॲड. दिलीप परचाके हे होते. 

या कार्यक्रमाला प्रमुख पाहुणे म्हणून माकप जिल्हा सचिव कॉ. ॲड. कुमार मोहरमपुरी, ॲड. डी. बी. नाईक, देविदास मोहकर, चंद्रशेखर सिडाम, कलावती शंकरराव दानव, मनीष इसाळकर, अनिता खुनकर, प्रीती करमणकर, रामभाऊ जिद्देवार, सदाशिव आत्राम, श्रीकांत तांबेकर, खुशालराव सोयाम, कवडू चांदेकर, सरिता दानव आदी मान्यवर मंचावर उपस्थित होते.

प्रभू राजगडकर पुढे बोलतांना म्हणाले की, “आदिवासींच्या जमिनी हस्तांतरित अथवा भाड्याने देण्यास मनाई करणारे कायदे अस्तित्वात असतानाही आज मोठे भांडवलदार त्या जमिनी भाड्याने घेऊन उत्खनन करत प्रचंड नफा कमवत आहेत. दुसरीकडे पोषण आहार कर्मचाऱ्यांनी रोजच्या मानधनात वाढ मागितल्यास सरकार केवळ तुटपुंजी वाढ देते, मात्र निवडणूक राजकारणासाठी मोफत योजनांचा मारा केला जात आहे. यावर एकही खासदार किंवा आमदार आवाज उठवत नाही; मात्र कम्युनिस्ट पक्ष सातत्याने रस्त्यावर उतरून संघर्ष करत आहे.”

यावेळी मार्क्सवादी कम्युनिस्ट पक्षाचे राज्य कमिटी सदस्य कॉ. अरुण लाटकर यांनी स्वातंत्र्य चळवळीतील विविध प्रवाह, स्वातंत्र्यानंतरच्या राजकीय सत्तेतील बदल आणि जनहिताच्या धोरणांपासून ‘रोजगारविहीन विकास’ व पुढे ‘रोजगार गमावणाऱ्या विकासा’पर्यंत झालेल्या प्रवासाचा सखोल ऊहापोह केला. “लोकशाहीत भांडवलदारांच्या गरजा पूर्ण होत नसतील, तर सत्तेचे रूपांतर फॅसिस्ट व्यवस्थेत होते. जगातील फॅसिस्ट सत्तांचा प्रतिकार करून त्यांना रोखण्याचे कार्य कम्युनिस्टांनीच केले आहे,” असे आपल्या मनोगतातून सांगितले.

अखिल भारतीय संविधानिक हक्क परिषदेचे अध्यक्ष कॉ. गीत घोष यांनी कॉ. शंकरराव दानव : व्यक्तित्व आणि संघर्ष या विषयावर मार्गदर्शन करताना म्हटले की, “कॉमरेड कधीही मरत नाही. वर्गआधारित शोषण नष्ट करून वर्गविहीन, शोषणविहीन समाज निर्माण करण्यासाठी केलेली त्याची कृतीच त्याला आदर्श, प्रेरणा आणि विचारांमध्ये सदैव जिवंत ठेवते,” असे विचार व्यक्त केले.

ॲड. डी. बी. नाईक यांनी आपले मनोगत व्यक्त करताना सांगितले की, “रक्ताचे नाते नसतानाही कॉ. दानव यांच्या स्मृतिदिनानिमित्त त्यांच्या विचारांवर व संघर्षावर चर्चा होत आहे, हेच त्यांच्या महान कार्याचे प्रतीक आहे.”

कार्यक्रमाचे संचालन कॉ. ॲड. कुमार मोहरमपुरी यांनी केले, तर देविदास मोहकर यांनी आभार मानले. कार्यक्रम यशस्वी करण्यासाठी कार्यकर्त्यांनी विशेष परिश्रम घेतले. या कार्यक्रमाला नागरिकांची मोठ्या संख्येने उपस्थिती लाभली.