“ग्रामीण शाळेची सुवर्णझेप"; अभिजात मराठीच्या स्वरांत पेटूर शाळेचा जिल्हा विजय

प्रशांत चंदनखेडे वणी :-

ज्ञान, शिस्त आणि सांघिकतेचा संगम जेव्हा रंगमंचावर अवतरतो, तेव्हा केवळ सादरीकरण होत नाही—तर इतिहास रचला जातो. नेहरू स्टेडियम यवतमाळ येथे पार पडलेल्या जिल्हास्तरीय ‘शो ड्रिल’ महोत्सवात जिल्हा परिषद उच्च प्राथमिक शाळा पेटूरच्या चिमुकल्या कलाकारांनी अशीच कर्तृत्वगाथा साकारत प्रथम क्रमांकाचा मान मिळवला आणि वणी तालुक्याचं नाव उंचावलं.

‘अभिजात मराठी भाषा’ या विषयावर आधारित सादरीकरण हे केवळ स्पर्धेपुरते मर्यादित नव्हते; तो मराठीच्या अस्मितेचा आणि संस्कारांचा जागर होता. अवघ्या पाच मिनिटांच्या मर्यादित वेळेत विद्यार्थ्यांनी आशयघन संवाद, नेमकी मांडणी आणि लयबद्ध हालचालींच्या माध्यमातून परीक्षकांना अक्षरशः स्तिमित केले. प्रत्येक हालचालीतून आत्मविश्वास झळकत होता, तर प्रत्येक शब्दातून मातृभाषेचा अभिमान दाटून येत होता.

जिल्ह्यातील सोळा पंचायत समित्यांच्या सहभागात पेटूर शाळेने वणी पंचायत समितीचे प्रतिनिधित्व करत आपल्या कलेची वेगळी छाप उमटवली. यापूर्वी केंद्र आणि तालुका स्तरावर मिळवलेल्या यशाची परंपरा कायम ठेवत विद्यार्थ्यांनी जिल्हास्तरावरही विजयश्री खेचून आणला. हा विजय केवळ ट्रॉफीपुरता नाही; तर ग्रामीण भागातील शाळाही गुणवत्तेच्या बळावर कोणतीही शिखरे सर करू शकतात, याचा तो ठोस पुरावा आहे.

या यशामागे मुख्याध्यापक संजय साखरकर यांचे दूरदर्शी नेतृत्व आणि शिक्षक भगवान चव्हाण, कु. मिनल बेझनवार व कु. प्रिया ठाकरे यांचे परिश्रम हे भक्कम अधिष्ठान ठरले. विद्यार्थ्यांच्या अंगी असलेली कला ओळखून तिला योग्य दिशा देण्याचे कार्य त्यांनी समर्थपणे पार पाडले. त्याचप्रमाणे पेटूर ग्रामपंचायतीनेही विद्यार्थ्यांना मोलाचे सहकार्य केले. सरपंच प्रविण झाडे यांनी विद्यार्थ्यांचं मनोधैर्य वाढवितांनाच त्यांना शो ड्रिलसाठी लागणारे साहित्य खरेदी करण्याकरिता आर्थिक मदतही केली. 

शाळा अव्वल आल्याची बातमी गावात पोहोचताच आनंदाचा जल्लोष उसळला. गावातून वाजत गाजत काढलेल्या मिरवणुकीत ग्रामस्थांनी आपल्या लेकरांचे उत्स्फूर्त स्वागत केले. हा क्षण गावासाठी केवळ अभिमानाचाच ठरला नाही, तर प्रेरणेचा दीप प्रज्वलित करणारा ठरला.

पेटूरच्या या चिमुकल्या प्रतिभावंतांनी सिद्ध केले आहे की, जिद्द, शिस्त आणि संस्कार यांच्या बळावर ग्रामीण मातीतूनही तेजस्वी यशाची सुवर्णकिरणे उगवू शकतात. जिल्हाभरात त्यांच्या या कर्तृत्वाचा गौरव होत असून वणी तालुक्याच्या नावलौकिकात आणखी एक मानाचा तुरा रोवला गेला आहे.

विद्यार्थ्यांच्या या यशस्वी कामगिरीबद्दल गटविकास अधिकारी किशोर गज्जलवार, गटशिक्षण अधिकारी स्नेहादीप काटकर, ग्रामसचिव प्रांजली वाढई यांनी त्यांच्यावर अभिनंदनाचा वर्षाव केला.

तसेच पेटूर ग्रामपंचायतीचे सरपंच प्रविण झाडे, उपसरपंच गजानन ढेंगळे, शाळा व्यवस्थापन समिती अध्यक्ष विनोद वऱ्हाटे, महादेव डवरे यांच्यासह पालक व ग्रामस्थांनी विद्यार्थी व शिक्षकांचे कौतुक करून त्यांना पुढील वाटचालीस शुभेच्छा दिल्या.