बॅडमिंटनमध्ये सुशगंगा पब्लिक स्कूलचा विजयी डंका! तालुकास्तरीय स्पर्धेत विद्यार्थ्यांची चमकदार कामगिरी

प्रशांत चंदनखेडे वणी :-

क्रीडा क्षेत्रात सातत्यपूर्ण यशाची परंपरा जपणाऱ्या सुशगंगा पब्लिक स्कूलच्या विद्यार्थ्यांनी तालुकास्तरीय बॅडमिंटन स्पर्धेत दमदार कामगिरी करत विजेतेपदावर आपले नाव कोरले. उत्कृष्ट खेळ, नियमित सराव आणि सांघिक समन्वयाच्या बळावर विद्यार्थ्यांनी स्पर्धेत आपली छाप पाडली असून, १२ विद्यार्थ्यांची जिल्हास्तरीय बॅडमिंटन स्पर्धेसाठी निवड झाली आहे. या यशामुळे शाळेच्या क्रीडा क्षेत्रातील कामगिरीत आणखी एका विजयी उपलब्धीची भर पडली आहे.

क्रीडा व युवक सेवा संचालनालय, महाराष्ट्र राज्य, पुणे यांच्या पुरस्कृत उपक्रमांतर्गत जिल्हा क्रीडा अधिकारी कार्यालय व जिल्हा क्रीडा परिषद, यवतमाळ तसेच तालुका क्रीडा अधिकारी, वणी यांच्या वतीने तालुकास्तरीय बॅडमिंटन स्पर्धेचे आयोजन करण्यात आले होते. या स्पर्धेत सुशगंगा पब्लिक स्कूलच्या खेळाडूंनी कौशल्यपूर्ण खेळाचे प्रदर्शन करत विजेतेपदाचा मान मिळविला.

या स्पर्धेत उल्लेखनीय कामगिरी करून जिल्हास्तरीय स्पर्धेसाठी निवड झालेल्या खेळाडूंमध्ये रिजवान हैदरी, जनक कुच्चेवार, सुजात अली, अरमान शेख, सोहम ताजने, रोहन नानवाणी, यश शंकदरवार, ईशा सुरपाम, आराध्या वाटेकर, आर्या पिसे, विराली भगत आणि आराध्या गटलेवार यांचा समावेश आहे.

नियमित सराव, खेळातील शिस्त, अचूक फटके आणि मैदानावरील चपळाई यांच्या जोरावर विद्यार्थ्यांनी ही यशस्वी कामगिरी केली. तालुकास्तरावर मिळविलेल्या या यशामुळे आता जिल्हास्तरीय स्पर्धेतही दमदार कामगिरी करण्याची संधी त्यांना मिळणार आहे.

विद्यार्थ्यांच्या या यशाबद्दल प्रशिक्षक आणि शाळेच्या वतीने त्यांचे अभिनंदन करण्यात आले. तसेच आगामी जिल्हास्तरीय स्पर्धेसाठी शुभेच्छा देण्यात आल्या. विद्यार्थ्यांनी मिळविलेले हे यश त्यांच्या मेहनतीचे, जिद्दीचे आणि क्रीडाकौशल्याचे प्रतीक असून, इतर विद्यार्थ्यांसाठीही ते प्रेरणादायी ठरणार आहे.

तालुकास्तरावरील विजेतेपदापासून जिल्हास्तरीय स्पर्धेपर्यंतची ही झेप सुशगंगा पब्लिक स्कूलच्या क्रीडा क्षेत्रातील वाटचालीला नवे बळ देणारी ठरली आहे.