जुन्या रंगभूमीच्या कर्तृत्वाला नव्या पिढीचा मानाचा मुजरा!

प्रशांत चंदनखेडे वणी :-

रंगभूमीचा इतिहास केवळ पडद्यावर सादर झालेल्या नाटकांमध्ये नसतो, तर तो आपल्या अभिनयाने आणि आयुष्यभराच्या कलासाधनेने समृद्ध करणाऱ्या ज्येष्ठ कलावंतांच्या अनुभवांतही दडलेला असतो. हाच वारसा नव्या पिढीपर्यंत पोहोचविण्याचा सुंदर प्रयत्न मराठी रंगभूमी दिनानिमित्त वणीत पाहायला मिळाला. सागर झेप बहुउद्देशीय संस्थेच्या वतीने ज्येष्ठ नाट्यकलावंत गणपत अतकारे यांचा त्यांच्या निवासस्थानी जाऊन सन्मान करण्यात आला.

संस्थेचे अध्यक्ष सागर मुने तसेच नाट्यकलावंत आणि बालनाट्य कलावंतांच्या उपस्थितीत हा छोटेखानी सन्मान सोहळा पार पडला. गणपत अतकारे यांना शाल, श्रीफळ, पुष्पहार आणि सन्मानचिन्ह प्रदान करून त्यांच्या रंगभूमीवरील योगदानाप्रती कृतज्ञता व्यक्त करण्यात आली.

रंगभूमी ही केवळ मनोरंजनाची कला नसून समाजजीवनाचे प्रतिबिंब दाखविणारे आणि विचारांना दिशा देणारे प्रभावी माध्यम आहे. अनेक ज्येष्ठ कलावंतांनी आपल्या अभिनयकौशल्याने, मेहनतीने आणि समर्पणाने मराठी नाट्यविश्वाचा वारसा समृद्ध केला आहे. अशा कलावंतांचा गौरव म्हणजे त्यांच्या कलेचा आणि संघर्षमय प्रवासाचा सन्मान होय.

विशेष म्हणजे, ज्येष्ठ कलावंतांच्या घरी जाऊन त्यांचा सन्मान करण्याच्या या उपक्रमात बालनाट्य कलावंतांचाही सहभाग होता. त्यामुळे नव्या पिढीला जुन्या रंगभूमीचा इतिहास, ज्येष्ठांचे योगदान आणि कलेप्रती असलेली निष्ठा जवळून अनुभवता आली. केवळ सत्कार न करता एका पिढीने दुसऱ्या पिढीकडे कलापरंपरेचा वारसा सोपविण्याचा हा उपक्रम ठरला.

ज्येष्ठ कलावंतांचा सन्मान करून त्यांच्या कलासाधनेला अभिवादन करणारा सागर झेप बहुउद्देशीय संस्थेचा हा उपक्रम वणीच्या सांस्कृतिक क्षेत्रात विशेष उल्लेखनीय ठरत आहे.